Capitulum Ecclesie Geuriensis vniuersis Christi fidelibus presens scriptum intuentibus salutem in Domino. Vniuersorum noticie tenore presencium innotescat, quod cum inter populos domine Regine de villa Bodok ex una parte, et inter Andream filium Ihonis de genere Osl ex altera, super quadam terre particula et super distinccione metarum suarum, materia questionis fuisset exorta et aliquandiu uentilata, tandem nos ad mandatum domini Regis cum Thoma de Scemere homine eiusdem, unum ex nobis transmisimus, cuius testimonio dictus Andreas et ijdem populi de Bodok ad concordiam uenientes, metas ipsorum terras distinguentes erexerunt; cuius facti seriem predictus Andreas personaliter, et Feldricus ac Egidius pro se et pro villa Bodok cum Tiba de Zukun et Mark filio Erkud iobagionibus sue condicionis comparentes coram nobis retulerunt viua uoce. Que quidem mete hoc ordine distinguntur: Incipit a metis villarum Joan et Ferteud, ubi sunt quatuor mete, quarum una ab oriente est predictorum populorum de villa Bodog, et altera est Andree filii Jhonis ex occidente, due autem sunt dictarum villarum Joan et Ferteud; deinde uenitur in uia erbosa uersus septemtrionem ad duas metas, que sunt iuxta eandem viam posite in virgulto, quarum una existens a parte orientali est populorum de villa Bodok, altera Andree supradicti; deinde progreditur in eadem uia usque ad locum, qui dicitur Bizuskuuth, ubi sub quadam piro est meta eorundem populorum, et alia iuxta eandem est a parte orientali Andree prenotati; abhinc uenitur ad siluam ipsius Andree; adhuc uersus septemtrionem, ubi sunt quatuor mete angulares, quarum due ex parte orientali sunt populorum prefatorum, due vero sunt Andree antedicti; deinde iuxta eandem siluam in magna via diuertens ad orientem uenit ad quandam ilicem, ubi sunt due mete, una scilicet in eadem ilice est sepedictorum populorum, altera in queren est Andree pretaxati; abhinc in eadem via uenitur ad quandam pirum, sitam in fine eiusdem silue, sub qua est meta populorum supradictorum et altera in nuda terra est ipsius Andree; deinde protenditur per duas metas ad quendam monticulum, qui dicitur Serholm, in quo sunt due mete, una populorum de Bodok ab oriente, altera Andree sepedicti; deinde iungitur antiquis metis, et transeundo per binas metas uenitur ad locum, qui dicitur Zamarvth versus aquilonem, ubi terminatur. In cuius rei memoriam et perpetuam firmitatem presentes concessimus litteras sigilli nostri munimine roboratas: anno Domini M°CC°LX° nono, Magistro Chepano Preposito, Hectore Cantore, Mikone Custode existentibus.

A B C

(Eredetie bőrhártyán, melyről a káptalan pecsétje sárga-vörös selyemzsinóron függ, a nemz. Muzeum irattárában.)