St. Dei gracia Vngarie, Dalmacie, Croacie, Rame, Seruie, Gallicie, Lodomerie, Cumanie, Bulgarieque Rex omnibus presens scriptum inspecturis salutem in omnium saluatore. Ad vniuersorum noticiam tenore presencium volumus peruenire, quod cum Chak Banus filius Magistri Demetrij, perpetuus Comes de Bokon, dilectus et fidelis noster nobis et regno nostro in feruore fidelitatis persistendo gratum inpenderit famulatum; nos qui ex officio suscepti regiminis seruicia cunctorum nobis fideliter famulancium metiri debemus, fidelitates ac laudabilia opera eiusdem Chak Bani attendentes circumspecte, volentesque eidem pro multiplicibus fidelitatibus et seruicijs suis meritoriis quandam remuneracionem ex liberalitate Regia non immerito respondere; licet respectu fidelitatum et seruiciorum suorum in pocioribus siue maioribus sibi debeamus prouidere, quasdam possessiones siue terreas, videlicet villam Lueld, villam Rydnuk, villam Wzturgar, et villam Fenewfew cum vduornicys nostris residentibus in eadem, dedimus donauimus et contulimus ipsi Chak Bano, et per eum heredibus suis et eorum successoribus iure perpetuo et irreuocabiliter possidendas pariter et habendas. Vt autem huius nostre donacionis series robur perpetue firmitatis optineat, nec processu temporum per quempiam valeat retractari, dicto Chak Bano presentes concessimus litteras duplicis sigilli nostri munimine roboratas. Datum per manus Magistri Benedicti Orodiensis Prepositi, aule nostre Vice-Cancellarij, dilecti et fidelis nostri; anno Domini M°CC° septuagesimo, Regni autem nostri anno primo.

(IV. László király 1281-ki megerősítő okmányából, melynek eredetie a Rumy család levéltárában, másolata a Magyar Akadémia kézirattárában találtatik.)