(S)tephanus Dei gracia Hungarie, Dalmacie, Croacie, Rame, Seruie, Gallicie, Lodomerie, Bulgarieque Rex omnibus Christi fidelibus presentes litteras inspecturis salutem in uero salutari. (A)d uniuersorum tam presencium quam futurorum noticiam harum serie volumus peruenire, quod Magister Thomas Prepositus Hantensis, familiaris clericus aule nostre, ad nostram accedens presenciam petiuit a nobis instanter et deuote, ut de nostro beneplacito et permissione liceret sibi quandam terram suam Bogna uocatam in Comitatu Zaladiensi sitam per dominum B. Regem karissimum patrem nostrum eidem collatam, et postmodum per nos confirmatam, cuidam seruienti suo Tristano nomine filio Vylma conferre perpetuo et donare. Adhibitis itaque idem Magister Thomas super transmissione dicte donacionis in Tristanum memoratum nostris consensu, assensu pariter et fauore, considerans pure et sincere meritoria seruicia eiusdem Tristani, que a primeuis sue puericie temporibus eidem Magistro Thome inpendisse dicitur, volensque gratuito preuenire remedio, predictam terram Bogna in eisdem metis et terminis, in quibus eidem fuerat collata, dedit, tradidit, contulit et donauit ipsi Tristano perpetue collacionis titulo tenendam pariter et habendam; et ob maiorem collacionis huiusmodi firmitatem duo priuilegia sua super predicta terra confecta, videlicet priuilegium domini Regis karissimi patris nostri super collacione, et nostrum super confirmacione de consilio et bona uoluntate fratrum suorum, ut idem Tristanus dictam terram vna cum fratribus et cognatis suis libere et quiete possidere ualeat, dedit eidem Tristano coram nobis inreuocabiliter possidenda et habenda. In cuius rei memoriam perpetuamque firmitatem ad instanciam et peticionem eiusdem Magistri Thome Prepositi, ut nullo unquam tempore in irritum valeat retractari, presentes eidem Tristano concessimus litteras duplicis sigilli nostri munimine roboratas. Datum per manus Magistri Benedicti Orodiensis Ecclesie Prepositi, aule nostre Vice-Cancellarij, dilecti et fidelis nostri; anno Domini M°CC° septuagesimo, Regni autem nostri anno primo.

(Eredetie bőrhártyán, melyről a király pecsétjének töredéke vörös selyemzsinóron függ, a budai kir. kamarai levéltárban.)