Karolus etc. uniuersis fidelibus Ecclesie etc. Per has patentes litteras omnibus volumus esse notam tam presentibus quam futuris, quod nos confidentes de prudencia Venerabilis et religiosi viri Bernardi Abbatis honorabilis Monasterij Cas(sinensis), et nobilis Baronis Aurelii de Carbaro, et Magistri Bernardi de Brulio, dilectorum familiarium, consiliariorum et fidelium nostrorum, et plenam fiduciam apponentes, facimus, constituimus et ordinamus eos procuratores nostros et nuncios speciales ad tractandum, faciendum et complendum ad honorem Dei et Sanctorum Ecclesie, pacta et conventiones amicitie perfecte, et valencie, et iuvaminis de uno ad alium, cum Magnifico et illustri Principe domino Stephano Dei gracia Rege Ungarie, Dice Transsyluanie, et Domino Cumanorum carissimo amico nostro, per se, quod nos teneamur ipsum bona fide adiuuare et defendere contra omnes Principes et Barones, et milites, et omnes homines, qui erunt inimici sui, et facere eis vivam guerram, et non facere inde nec treugam, nec guerram retrodictam, scilicet contra omnes Theotonicos et Theotonie aderentes, prope ipsum ad quatuor dietas; et contra omnes existentes extra fidem Ecclesie, et contra omnes alios homines de mundo, qui vellent sibi aufferre aliquam terram suam, vel qui eunt hostiliter terram eius intrare. Et eodem modo dominus Rex Ungarie teneatur nobis, et omnibus, et per omnia, contra predictos superius nominatos et alios inimicos dare consilium, auxilium et iuuamen, et eis facere vivam guerram bona fide, et non facere treugam, vel pacem, vel guerram retrodictam cum eis vel aliquo ipsorum absque nostro consilio et consensu. Dantes dictis procuratoribus nostris, uel duobus ex eis, plenariam potestatem faciendi predicta omnia, et alia pertinencia ad predicta, cum ipso domino Rege, sicut ipsi domino Regi et ipsis procuratoribus, vel duobus ex eis videbitur expedire, et iurandi in anima nostra, predicta attendere et seruare, sicut ipse Rex iurabit eis recipientibus nostro nomine, et obseruare; salua semper fide, quam uterque nostrum tenetur Sancte Ecclesie nostre. Promittentes nos ratum habituros et firmum, quidquid predicti procuratores nostri, vel duo ex eis, facient in predictis vel aliquo predictorum. In cuius rei testimonium presentes litteras fieri et sigillo Maiestatis nostre iussimus conuenire. Datum Melfie XIIII Septembris, Indiccione XIII.

(Racki Ferencz, a nápolyi kir. levéltárban őrzött „Registi Angioini”-ból, Arkiv za povjestnicu jugoslavenski VII. köt. 11. l.)