Reverendissimo et Sanctissimo in Christo Patri domino Pape, si est in presenti, et omnibus summis Pontificibus futuris, et Sacro Cetui Cardinalium, Karolus etc. se ipsum ad pedes Summi Pontificis cum omni reuerencia et honore, et dominis Cardinalibus salutem et sincere devocionis affectum. Per has patentes litteras Sanctitati Vestre facio manifestum, quod ad honorem Dei, et Sancte Romane Ecclesie, et tocius fidei Christiane fecimus et facere intendimus matrimonia et alia certa pacta cum Magnifico Principe domino Stephano illustri Rege Ungarie, Duce Transsylvano et Sclavonie et domino Cumanorum, Catholico, et fidelissimo Sancte nostre Ecclesie; et ut predicta, prout in litteris suis et nostris videbitis contineri, maiorem habeant firmitatem, requiro dominum Summum Pontificem, et dominos Cardinales Apostosica Sede vocante, quod ipsa pacta debeant confirmare, et dare litteras apertas ipsi Regi Ungarie. Quod si ex parte nostra aliquis defectus interueniat, quod nos et filios nostros, et omnes, qui pro nobis iurabunt, excommunicabitis, et totum Regnum nostrum sit interdictum, donec adimpleuerimus ipsa pacta. In cuius rei testimonium presentes litteras fieri et sigillo Maiestatis nostre iussimus conueniri. Datum Melfie XV. Septembris, Indiccione XIII.

(Racki Ferencz u. o. 12. l.)