In nomine Dei aeterni Amen. Anno Incarnationis ejusdem millesimo ducentesimo septuagesimo, Indict. XII. decimo die exeunte Septembris. Regnante Domino nostro Bela, Serenissimo Rege Ungarie, temporibus domini Iohannis venerabilis Spalatensis Archiepiscopi, Miche Madii, Petri Sirichie, Dobri Madii Judicum. Quoniam vniuersa mortalium facta nimia temporis proclivitate, et annorum diversione a memoria dilabuntur et penitus oblivioni traduntur, nisi nimia cum diligentia, et curiositate illa per scripta authentica depromantum, vel in scriptis manu publica redigantur; ideo nos Don Duymus Archidiaconus, et vniuersum Capitulum Ecclesiae Sancti Domnii, qui sumus Dei officio mancipati, et quotidie die noctuque in Diuinis persistimus laudibus, horis debitis et statutis; attendentes bonas et legitimas nostrorum antiquorum consuetudines, maxime et specialiter de eo, quod si quilibet clericus in kalendis Martii ab hoc saeculo decessisset, totam partem suorum ecclesiasticorum preventuum ipsius anni haberet, et de ipso disponeret, prout vellet; considerantes id sanctum et justum fore de nostri Capituli proventibus, simili modo unanimiter, et concorditer, Spiritus Sancti gratia invocata, statuimus et ordinamus in scriptis per manum publicam redigentes: Quod si quilibet Canonicus in kalendis Martii decederit, totam suam partem ipsius anni totaliter deberet habere, et de ipsa disponere, et ordinare, et etiam testamento legare; prout voluerit, et sibi melius videbitur expedire, ut de sua propria re posset, absque alicujus personae contradictione; promittentes et sub juramento confirmantes tam nos Archidiaconus, quam vniuersi Fratres de Capitulo hoc statutum observare, et manutenere, et nulli jus suum denegare, nec aliquid de ipso infringere vel violare. Et ad majorem cautelam, et securitatem, ut ad posteriorum perveniat noticiam, et nullus super hoc dubitare possit, praesentem (így) publicum instrumentum nostri sigillo Capituli fecimus communiri. Actum ante Ecclesiam Beati Domnii, in presentia Domini Dominici et Stephani Presbyterorum, Petri Zanini, et Andreae laicorum.

Et ego Franciscus Stipe Madii filius examinavi.

Ego vero Dominus Lucas Canonicus et Juratus Notarius Spalatensis, iis interfui, et de mandato praedicti domini Archidiaconi, et uniuersi Capituli, et meo, ut audivi, subscripsi, et roboravi.

(Farlati, Illiricum Sacrum III. köt. 283. l.)