Capitulum Ecclesie Jauriensis vniuersis Christi fidelibus presens scriptum intuentibus salutem in Domino. Ad vniuersorum noticiam tenore presencium volumus peruenire, quod Thoma filio Euzen de Zemera pro Comite Laurencio filio Comitis Petri domino suo ex una parte; et Karulo pro se, et pro Paulo, Karulo ac Fridirico filijs suis; item Farcasio filio dicti Karuli personaliter; item Boyon pro se et pro Gurge Fratre suo; item Cheke filio Gregorij, et Erkud ac Bogdasa; item Marino filio Kol de Geotan, iobagionibus quondam Castri de Luchman ab altera coram nobis constitutis; dictus Thomas nomine et vice memorati domini sui est confessus: quod cum Bela Rex Quartus bone memorie Comitatum de Luchman cum suis pertinencijs dicto domino suo propter suorum prerogatiuam meritorum iure perpetuo contulisset; idem dominus suus quandam particulam terre de terra ville Georan decisam ad quatuor aratra, simul cum feneto et silua, sufficientem, sicut dixit, Karulo et cognatis suis supradictis, qui iuxta eandem similiter terram hereditariam ad usum trium aratrorum habere dicuntur, dedisset et assignasset perpetuo possidendam; tali condicione et pacto, quod idem Karulus et cognati sui, ac eorum heredes, in recompensacionem ipsius terre, prefato Comiti et suis heredibus seruire tenebuntur; eundo cum eo ad curiam domini Regis, et ad exercitum cum armis decentibus, quociens expedierit, et pacuerit Comiti memorato. Addiderunt eciam, quod eadem terra adiacet terre Comitis Herbordi Chava uocate, et terre hereditarie Karuli et cognatorum suorum predictorum, quibusdam terminis et signis consignata. In cuius rei memoriam presentes litteras concessimus sigilli nostri munimine roboratas, anno Domini M°CC° septuagesimo. Chepano Preposito, Hectore Cantore, Mikone Custode Ecclesie nostre existentibus.

(Eredetie bőrhártyán, melynek sárga-barna zsinóron függött pecsétje elveszett; a budai kir. kamarai levéltárban.)