Gregorius Episcopus seruus seruorum Dei dilectis filijs... Priori, et fratribus Ordinis Praedicatorum Spalatensibus salutem et apostolicam benedictionem. Cum a nobis petitur, quod iustum est et honestum, tam vigor aequitatis, quam ordo exigit rationis, ut id per sollicitudinem officii nostri ad debitum perducator effectum. Sane petitio vestra nobis exhibita continebat, quod venerabilis frater noster Spalatensis Archiepiscopus ad Ordinem vestrum, cujus professioni pium habens respectum, concessionem de loco, quem inhabitans a praedecessoribus suis Spalatensibus Archiepiscopis, qui fuerunt pro tempore, prout ad eos spectabat - - - - - ratificans, et approbans; et considerans, quod locus praedictus nimium arctus erat, pro ecclesia vestra et domibus ampliandis, quandam partem horti sui archiepiscopalis juxta locum praedictum positam, Capituli sui ad id accedente consensu, pia et provida liberalitate concessit, prout in patentibus litteris inde confectis, ipsorum Archiepiscopi et Capituli sigillis munitis plenius dicitur contineri. Nos itaque vestris supplicationibus inclinati, quod super hoc provide factum est, ratum habentes et firmum, id auctoritate Apostolica confirmamus, et praesentis scripti patrocinio communimus. Nulli ergo hominum liceat hanc paginam nostrae confirmacionis infringere, vel ei ausu temerario contraire. Si quis autem hoc attentare praesumpserit, indignationem Omnipotentis Dei, et Beatorum Petri et Pauli Apostolorum eius se noverit incursurum. Datum apud Urbem Veterem XIV. kalendas Augusti, Pontificatus nostri anno primo.

(Farlati, Illyricum Sacrum III. köt. 284. l.)