Nos Magister Sixtus Lector Strigoniensis, judex a domino nostro Stephano, Illustri Rege Hungarie super terris vduornicorum suorum per totum Regnum suum pro tempore constitutus, significamus vniuersis presentes litteras inspecturis; quod nobis pro exequendo mandato Regio in Comitatum vdwornicorum de Sag uenientibus, vdwornici domini Regis de uilla Buruzd, Andrea Comite et Samuele Centurione ipsorum, eis assistentibus, de nobilibus uiris Alexandro et Chepano filijs Laurencij de genere Jak coram nobis querimoniam deponere curauerunt, proponentes et dicentes, quod ipsi nobiles infra territorium terre ipsorum uillam nomine Thukurch congregauerant, quandam partem terre ipsorum ad duo aratra de parte aquilonis eorum territorio continuam seu contiguam occupando in eorum preiudicium et grauamen; quam terre partem per nos auctoritate Regia sibi restitui pecierunt, et uillam ipsam exin penitus remoueri. Prefati uero nobiles ex aduerso responderunt, dictam terre partem ad se iure hereditario pentinere; adicientes, quod cum prius coram bone memorie domino Gregorio Episcopo Jauriensi, judice super causis terrarum a felicis recordacionis domino Bela quarto illustri Rege in Episcopatu Jauriensi delegato, et secundo coram Magnifico uiro domino Rorando tum Comite Palatino, et demum coram nobili uiro Comite Nicolao Sinistro judice super terris vdwornicorum per eundem dominum Regem per totum Regnum Hungarie constituto, ijdem vdwornici super predicta parte terre ad quantitatem duorum aratrorum contra ipsos nobiles mouissent in judicio questionem, ipsi nobiles coram ipsis judicibus luce clarius probauerant, terram ipsam ad se iure hereditario pertinere; et sic ab ipsorum vdwornicorum inpeticione calumpniosa fuerant per eosdem judices sentencialiter absoluti, certis metis antiquis interpositis, que terram ipsorum a terra vdwornicorum separant predictorum. Que omnia predicti Alexander et Chepanus per litteras patentes predictorum trium judicum, eorum sigillis autenticis munitas apertissime probauerunt. Nos igitur, cum ipsi vdwornici nichil contra predictas litteras racionabiliter potuissent ostendere uel probare, ad intar predictorum trium judicum terram ipsam ad duo aratra petitam sub eisdem predictis metis antiquis eisdem Alexandro et Chepano reliquimus pacifice possidendam; ipsis nec vetus ius in hac parte tollentes, nec nouum aliquod conferentes. In cuius rei testimonium presentes dedimus litteras sigilli nostri munimine confirmatas. Datum in die Pentecostes anno Domini M°CC°LXX°II°.

(Eredetie bőrhártyán, melyről bőrzsinegen az ép pecsét lefügg, néhai Jankovics Miklós kéziratai közt 5. szám a. V. ö. Fejér Cod. Dipl. VII. köt. 2. r. 22. l.)