Frater Elias Magister Domus Hospitalis Sancti Regis Stephani de Strigonio et totus Conuentus eiusdem Domus omnibus Christi fidelibus presentes litteras inspecturis salutem in omnium saluatore. Ad vniuersorum noticiam tenore presencium uolumus peruenire, quod Peturke filius Jordan de Epel coram nobis personaliter constitutus, confessus est, quod cum ipse vnicum habuerit filium, et idem in domini regis et Regni seruicio, uidelicet in exercitu, sit interemptus, et nunc heredum careat solacio; ipse terram suam hereditariam, sufficientem ad vnum aratrum, uel circa hoc, quam habet in Epel inter terram Capituli Strigoniensis, pro remedio anime sue et predicti filij sui in exercitu interempti, dederit, tradiderit, et donauerit predicto Strigoniensi Capitulo cum omnibus vtilitatibus et pertinencijs suis perpetuo possidendam, et specialiter dedit et donauit coram nobis; et ipsum Strigoniense Capitulum in eiusdem terre sue et ipsius utilitatum corporalem et pacificam possessionem in hominis nostri presencia introduxit. In cuius rei testimonium et memoriam, ad peticionem eiusdem Peturke predicto, Strigoniensi Capitulo super ipsa terra presentes concessimus litteras, sigilli nostri munimine roboratas. Datum tercio decimi kalendas Junij anno domini millesimo CC° septuagesimo secundo.

(Az eredeti után Knauz Nándor, Magyar Sion III. köt. 149. l.)