Nos Stephanus Dei gracia Rex Hungarie damus pro memoria, quod cum ab olim inter Kemen, Reynoldum et Jak filios Ebed, Isep filium Isep, Kenezyum filium Vrbani de Sukurod, Gregorium filium Gregorij de Ond, ac Martinum de eadem ab vna parte; Ponych Comitem de genere Buzad ac Jacobum filium eiusdem ex altera; coram judicibus ex parte nostra ac domini Regis karissimi patris nostri tunc deputatis fuisset questio uentilata super possessionibus in priuilegio eiusdem karissimi patris nostri et diuersis judicum aliorum litteris nominatis, ac demum tam super illis possessionibus, quam eciam super trium hominum, eiusdem Gregorij videlicet, et Oundi filij eius, ac Joance cognati filiorum eiusdem Ebed, iuxta continenciam priorum litterarum nostrarum in octauis Sancti Michaelis coram nobis duellum fieri debuisset; tandem adueniente ipso termino, antequam pugiles parcium dimicaturi precederent earundem, nos vnacum Baronibus nostris, qui aderant, sedatis omnibus contencionibus, que a longo tempori (így) durauerant, et reuocatis litteris, priuilegijs ac instrumentis vniuersis habitis et impetratis hinc et inde, inter partes pacem et ordinacionem huiusmodi stabiliuimus: Quod primo et principaliter possessiones ipsius Comitis Ponych que ab ipso alienate filijs Comitis Ebed et socijs eorum predictis iuxta continenciam, priuilegij eiusdem karissimi patris nostri fuerunt assignate, sunt eidem Ponych Comiti restitute pleno iure; ita tamen quod ipse Comes Ponych tam pro morte predictorum trium hominum, quam pro alijs articulis, in quibus contra partem alteram conuictus fuisse apperebat, soluet eisdem filijs Ebed, Isep et socijs eorum prenotatis coram Capitulo Albensi partim in estimacione condigna secundum Regni consuetudinem approbatam, partim autem in argento mercimoniali, centum et septuaginta marcas in tribus terminis infrascriptis; videlicet quinquaginta marcas soluet centesimo die ab octauis Beati Michaelis proxime preteritis computando, soluturus cum iudicio, si tunc cessauerit in soluendo; item quinquaginta marcas soluet centesimo die a termino proxime solucionis numerando, incursus penam dupli, nisi solueret illo die; residuum vero pecunie eiusdem, videlicet septuaginta marcas soluet centesimo et quadragesimo die a termino secunde solucionis, amissurus pecuniam in prioribus duobus terminis persolutam, si in ipso termino negligens extiterit in solucione facienda; et nichilominus eedem possessiones in prioribus litteris nominate remanebunt filijs Ebed et eorum socijs prenotatis possidende pacifice iuxta continenciam litterarum earundem. Preterea idem Ponych Comes et filius suus predictus reliquerint, dimiserunt et dederunt ex forma composicionis in duello facte ipsis filijs Ebed, isep et socijs eorum pretaxatis duas terras eorum Ozyuhagh et Sukurod vocatas cum earum vtilitatibus omnibus et pertinencijs vniuersis, ita tamen quod mediatas terrarum earundem in octauis Sancti Martini presente homine Capituli Albensis, quem illic filij Ebed et socij eorum predicti adducent, estimabitur secundum Regni consuetudinem per Andream de Hydweg et Petrum filium Nyomus, quos pro parte sua filij Ebed et socij sui ibi ducent, item per Opoy filium Opoy, et Besem de Palah, illic pro parte Ponych Comitis ducendorum; et precium medietatis terrarum earundem sic estimate ijdem filij Ebed et socij eorum tenentur recipere et assumpmere ad racionem seu numerum iuxta suam quantitatem pecunie supradicte, aliam vero medietatem terrarum earundem tam ipsi filij Ebed, quam Isep et alij socij eorum predicti simpliciter et sine pecunia aliqua habebunt et possidebunt pacifice, sicut ex forma composicionis coram nobis ordinate id specialiter extitit ordinatum. Ceterum hoc eciam dispositum extitit inter partes, quod si memorati Ponych Comes et filius suus coacti uel quocunque alio casu omnes aut aliquas de possessionibus in predictis litteris specificatis uendere uel obligare uoluerint, antequam in suma predicta a filijs Ebed et eorum socijs fuerint legitime expediti, idem emptor aut per obligacionem receptor possessionum earundem de precio illarum possessionum usque ad summam supradictam non ipsi Comiti Ponych et eius filio, sed nomine eorum et in expedicione ipsorum soluere debent et dare pecuniam filijs Comitis Ebed et socijs eorum in terminis ad solucionem huiusmodi deputatis. Adhuc ut partes eedem premissam ordinacionem, habita releuacione aliquali, et attendere et facilius valeant tolerare, a debito seu iudicio, quo racione duelli seu composicionis habite in duello Judici Curie nostre et pristaldo eiusdem de iure tenerentur, nos propter pacis ipsorum firmitatem expediuimus eosdem; factis autem solucionibus et completis premissis partes debent sibi dare mutuo litteras Capituli Albensis stabiles super confirmacione stabili premissorum. Datum in Phyuzegthu Dominico die proximo ante quindenas Sancti Michaelis.

(Eredetie bőrhártyán a nemz. muzeum kézirattárában.)