Ladizlaus Dei gracia Hungarie, Dalmacie, Croacie, Rame, Seruie, Gallicie, Lodomerie, Cumanie, Bulgarieque Rex omnibus Christi fidelibus presens scriptum inspecturis salutem in omnium saluatore. Officij nostri debitum remedijs inuigilat subiectorum, ut dum eorum excutimus honera, dum scandala remouemus, dum concedimus quod merentur; nos in eorum quiete quiescimus et pacis commodo gratulamur, ad instar misericordie Altissimi Conditoris, qui dum alta prospicit, infima non contemnit; dum colligit nobiles ad se uenire, degeneres non recusat. Hac itaque consideracione inducti ad vniuersorum tam presencium quam futurorum noticiam tenore presencium uolumus peruenire, quod nos circumspeccione prouida attendentes et considerantes fidelitates et seruiciorum merita Sandur et Gal filiorum Bent de uilla Kerowa jobagionum Castri Strigoniensis fidelium nostrorum, que a primeuis adolescencie sue temporibus auo nostro et patri nostro victoriosissimis Hungarie Regibus piarum recordacionum, ac nobis demum et Regno in omnibus Regni expedicionibus cum feruore fidelitatis eximie laudabiliter inpenderunt, se et suos pro Corone Regie defensione et Regni commodo dubijs fortune casibus, et uariis periculorum articulis intrepide submittendo. In reconpensacionem tot et tantorum seruiciorum suorum eosdem Sandur et Gal a jabagionatu Castri Strigoniensis cum omnibus terris suis de liberalitate Regia duximus eximendos, et in numerum, cetum seu collegium seruiencium Regalium transferendos; volentes, quod tam ijdem Sandur et Gal, quam suorum (így) heredes heredumque successores ea gaudeant et fruantur libertate, qua ceteri Regni nostri nobiles seruientes Regales gratulantur sub vexillo Regio militantes. Vt igitur presens nostra ordinacio seu concessio liberaliter facta robur perpetue firmitatis obtineat, nec per quempiam in irritum possit vel debeat lapsu temporum aliquatenus reuocari, presentes concessimus litteras sigilli nostri duplicis munimine roboratas. Datum per manus Magistri Benedicti Orodiensis Ecclesie Prepositi, aule nostre Vice-Canceliarij dilecti et fidelis nostri anno Domini MşCCş septuagesimo tercio, sexto idus Julij, Regni autem nostri anno primo. Vacante Ecclesia Strigoniensi; venerabilibus patribus Stephano Colochensi et Johanne Spalatensi Archiepiscopis; Lamperto Agriensi, Briccio Chenadiensi, Job Quinqueecclesiensi, Philippo Waciensi aule domine Regine karissime consortis nostre Cancellario Comite Neugradiensi, Paulo Wesprimiensi aule nostre Cancellario, Lodomerio Waradiensi, Tymoteo Zagrabiensi, Dyonisio Jauriensi, et Petro Transsiluano Episcopis Ecclesias Dei feliciter gubernautibus. Rolando Palatino et Judice Cumanorum, Herrico Bano totius Sclauonie, Nycolao Woyowoda Transsiluano Comite de Zonuk, Jowachino. Magistro Tawarnicorum nostrorum, Renoldo Magistro Dapiferorum nostrorum Comite Zulgageuriensi, Vgrino Magistro Agasonum nostrorum Comite Syrmiensi, Laurencio Magistro Pincernarum nostrorum Comite de Kewe et de Karasu, Paulo Bano de Zeurino, Moys Comite Symigiensi, Dedalo Comite Zaladiensi, Michaele Comite Nytriensi et alijs quam pluribus Comitatus Regni tenentibus et honores.

(Eredetie bőrhártyán, a pecsét elveszett; a budai kir. kamarai levéltárban.)