Nos frater Guiyllermus Preceptor et Cruciferi Domus Hospitalis de Noua Curia memorie commendantes notificamus quibus expedit vniuersis, quod constitutis coram nobis Farkasio filio Stephani de Lonkochz a parte una, Varou filio Peterne de eadem ab altera, idem Farkasius dimidietatem terre sue a Mychaele filio Comitis Mychaelis sibi deuolute, site in eadem Lonkochz, a plaga aquilonis adiacentem, confessus est se vendidisse Varou antedicto pro marca, fertone et dimidio plene ab eodem receptis, iure perpetuo et in heredum heredes possidendam nullius contradiccione mediante. Cuius eciam terre alteram dimidietatem idem Farkasius adhuc antea uendidisse se asseruit Varou memorato; priuilegio Capituli Vesprimiensis super eadem terra confecto, cum idem Farkasius ipsum se habere denegauerit, pro casso, et inani, ac sine iuribus, si umquam exhibitum fuerit, remanente. Tali insuper condicione interposita, quod si aliquis uel aliqui processu temporum predictum Varou uel ipsius heredes occasione memorate terre impetere quocunque modo attemptauerint; extunc idem Farkasius, et per consequens ipsius heredes expedire tenebuntur eosdem proprijs laboribus et expensis, et sic facta expedicione relinquent eandem terram totam Varou et filijs eiusdem sine dampno et pacifice possidendam. Cuius quidem totius terre metarum distinccio incipit in fluuio Lonkoch uersus aquilonem ab arbore egur pro meta assignata; inde procedit ad orientem directe per terram arabilem, et transita quadam strata publica peruenit ad arborem pomi in ualle sitam, in qua est meta; exhinc adhuc ad orientem tendendo peruenit ad arborem ilicis sitam subtus vineam filiorum Stefand, in qua est meta; ab hinc iuxta eandem vineam ascendit adhuc ad orientem ad uiam in superiori parte ipsius vinee percurrentem, ubi sunt due mete terree, et ibi continuatur terre hereditarie Varou prenotati; abinde in eadem uia uertitur ad meridiem, et eundo satis per amplum usque ad uiam agagusuth uocatam descendit in uallem, ubi est meta; deinde adhuc ad meridiem in eadem ualle uergendo peruenit ad metas Comitis Petri de Palah; et satis per longum pergendo peruenit ad quandam semitam ad arborem pomi, in qua est meta; exinde flectitur ad occidentem per eandem semitam ad angulum unius saltus ad unam metam terream; hinc directe per nemus ad occidentem descendendo incidit in eundem fluuium Lonkochz, et ibi terminatur. In cuius vendicionis memoriam firmitatemque perpetuam ad instanciam parcium presentes concessimus litteras sigilli nostri munimine roboratas, anno Dominice Incarnacionis Mş CCş LXXş tercio.

(Eredetie bőrhártyán, melynek hártyazsinegen függött pecsétje elveszett; a budai kir. kamarai levéltárban.)