Ladizlaus Dei gracia Hungarie, Dalmacie, Croacie, Rame, Seruie, Gallicie, Lodomerie, Cumanie Bulgarieque Rex omnibus Christi fidelibus presentes litteras inspecturis salutem in omnium saluatore. Ad uniuersorum noticiam tenore presencium volumus peruenire, quod cum Ders et Demetrius filij Hunth fideles nostri a primeuis puericie sue temporibus multa et diuersa fidelitatis obsequia in omnibus Regni nostri expedicionibus, in quibus frequenter uulnera letalia pertulerunt, laudabiliter impendissent, que per singula non possent commode recitari; nos ipsorum obsequiosa merita et meritoria obsequia pre oculis habentes, volentesque eisdem propter hoc gracia uicissitudine respondere, quandam terram Dragus uocatam, quam Morouch filius Mathie de Scelchen exemptam a terris Castri nostri Huntensis ex collacione Regia possidebat, ab eodem Morouch propter infidelitatis sue notam, quam in adiungendo se Cumanis tunc nostris infidelibus, et unacum eisdem contra nos insurgere presumendo, cum per eosdem Cumanos uaria guerrarum discrimina in Regno nostro commota fuerant, incurrit, auferendo eisdem Dyrs et Demetrio, ac per ipsos eorum heredibus heredumque successoribus contulimus, dedimus et donauimus, cum omnibus suis pertinencija et utilitatibus, et sub hijsdem metis ac terminis, quibus per priores possessores limitata fuerat et possessa, perpetuo et irreuocabiliter possidendam; predicto Morouch super ipsa terra perpetuum silencium inponendo, priuilegia eciam siue instrumenta alia, si qua idem Morouch habet super collacione ipsius terre, auctoritate presencium irritando. Eosdem Ders et Demetrium in corporalem possessionem dicte terre Dragus per Kemus de Byl hominem nostrum cum testimonio fidelium nostrorum Strigoniensis Capituli, conuocatis omnibus commetaneis et vicinis, et nemine contradictore existente, prout uidimus in eiusdem Capituli litteris contineri, fecimus introduci. Vt igitur hec nostra donacio robur perpetue firmitatis obtineat, presentes concessimus litteras dupplicis sigilli nostri munimine roboratas. Datum per manus Magistri Benedicti Electi Strigoniensis, perpetui Comitis loci eiusdem, Prepositi Budensis, aule nostre Vicecancellarij dilecti ac fidelis nostri anno Domini MşCCşLXXş quarto V. kalendas Aprilis, Regni autem nostri anno secundo. Venerabilibus patribus Stephano Colocensi et Johanne Spalatensi Archiepiscopis; Lamperto Agriensi, Briccio Chanadiensi, Joub Quinqueecclesiensi, Philippo Vaciensi aule domine Regine Cancellario, Paulo Vesprimiensi aule nostre Cancellario, Tymotheo Zagrabiensi, Lodomerio Varadiensi, Dyonisio Jauriensi et Petro Transsiluano Episcopis Ecclesias Dei feliciter gubernantibus; Dyonisio Palatino Comite de Oclich et Judice Cumanorum, Henrico Bano tocius Sclauonie, Nycolao Voiuoda Transsiluano Comite de Zounuk, Joachyno Magistro Tauarnicorum nostrorum, Nycolao Judice Curie nostre Comite de Guechke, Rynoldo Magistro Dapiferorum nostrorum Comite Zolgageuriensi, Herbordo Magistro Agasonum nostrorum Comite de Barana, Nicolao Magistro Pincernarum nostrorum Comite de Bereg, Paulo Bano de Zeurino, Moys Magistro Tauarnicorum domine Regine Comite Symigiensi, Deudalo Comite Zaladiensi, Johanne Comite Svprvniensi, et alijs quam pluribus Comitatus Regni tenentibus et honores.

(Eredetie bőrhártyán, a pecsét elveszett, a m. b. Nyáry családnak bagongnai levéltárában. Közli m. b. Nyáry Albert ur.)