Ladislaus Dei gracia Hungarie, Dalmacie, Croacie, Rame, Seruie, Gallicie, Lodomerie, Cumanie, Bulgarieque Rex, omnibus Christi fidelibus tam presentibus quam posteris litteras presentes inspecturis, salutem in salutis largitore. Regali dignum est et expediens eos, qui in dominorum seruicijs et expendiosis famulatibus diucius se exercent, munifice gratulari, vt eo amplius ipsorum exemplo ceteri ad fidelitatis opera uehemencius inuitentur. Hinc est igitur; quod accedens ad nostre Maiestatis presenciam Petrus filius Becer de Budafalwa noster pugil specialis, vndecies se in area certaminis nostro ex mandato, vt pugil strenuus preliando triumphum laudabilem et optatum obtinuisse rememorans et proponens; in prelio eciam nostro cum Atakaro Rege Bohemorum iuxta fluuium Morua habito, in quo quidem prelio idem Petrus filius Becer diris wlneribus sauciatus, cum nostris ceteris fidelibus more fidelium prelians multipliciter meruit commendari, eodem Rege Bohemorum in dicto prelio interempto seu mortuo. Tandem nos instantissime ipse Petrus filius Becer supplieando postulauit, vt in recompensacionem talium et tantorum seruiciorum suorum cum fratribus et proximis suis, uidelicet filijs Martini, item filijs Bechus, nec non filijs Andoch, ac filijs Mark de eadem, a condicione et numero Comitum Vduornicorum, qui filij Comitum Vduornicorum dicuntur, eximi, seu eximendo, et per nostram Excellenciam in cetum et consortium Regni nostri nobilium sub vexillo nostro famulancium, simul cum terris et possessionibus ipsorum, dignaremur aggregare. Suis igitur peticionibus predicti Petri filij Becer nostri - - - qui pro suis fidelitatibus et meritorum seruicijs - - - - per nos dileccione esset attollendus, ipsum cum (fratribus) et proximis prenotatis, vnacum terris et possessionibus ipsorum, de cetu et consorcio ac condicionatu filiorum Comitum Vduarnicorum eximentes, et in cetum ac consorcium Regni nostri nobilium, nobis sub uexillo nostro more exercituantis famulancium, de nostra benignitate Regia duximus asscribendo coniungendum. Quemadmodum progenitores ipsorum primitus ab antiquo in libertate nobilium Regni nostri mediante priuilegio Regis Andree aui nostri carissimi euidenter per nos experto dinoscebantur gratulari. Volentes quod decetero idem Petrus noster pugil, fratres, et cognati sui prenominati, illa et eadem gaudeant libertate, qua ueri nobiles Regni nostri gratulantur. Vt igitur series huius gracie robur obtineat perpetue firmitatis, nec processu temporum per quempiam possit vel debeat reuocari; presentes concessimus litteras dupplicis sigilli nostri munimine roboratas. Datum per manus discreti uiri Benedicti Sancte Strigoniensis Ecclesie Electi, eiusdemque loci Comitis Perpetui, Prepositi Budensis, aule nostre Vice-Cancellarij dilecti et fidelis nostri; presentibus Stephano Colocensi, Johanne Spalatensi Archiepiscopis; Lamperto Agriensi, Briccio Chanadiensi, Job Qinqueecclesiensi, Paulo Vesprimiensi aule nostre Cancellario, Philippo Waciensi, aule domine Regine consortis nostre carissime Cancellario, Lodomerio Varadiensi, Tymotheo Zagrabiensi, Dyonisio Jauriensi, Petro Transsiluano Episcopis Ecclesias Dei feliciter gubernantibus. Dyonisio Palatino Comite de Occlycz et Judice Cumanorum, Matheo Wayuoda Transsiluano, Egidio Magistro Tauarnicorum nostrorum, Vgrino Bano de Zewrinio, Herbordo Magistro Dapiferorum nostrorum Comite de Baranya, Laurencio Comite Supruniensi, Gregorio Comite Castri Ferrei, Moyus Magistro Tauarnicorum domine Regine consortis nostre predicte, Jacobo Comite Nitriensi, et alijs quam pluribus Comitatus Regni nostri tenentibus et honores. Anno Domini millesimo ducentesimo septuagesimo quarto, Regni autem nostri anno tercio, sexto Idus Septembris.

(Eredetie van a gr. Sztáray levéltárban, honnan annak másolatát Ertly János levéltárnok 1839-ben Döbrentei Gáborral s ez gróf Teleki Józseffel közölte, kinek oklevélmás gyűjteményéből közli Szabó Károly.)