Gregorius Episcopus seruus seruorum Dei, dilectis filijs Capitulo Ecclesie Strigoniensis salutem et Apostolicam benedictionem. Cum a nobis petitur, quod iustum est et honestum, tam uigor equitatis, quam ordo exigit rationis, ut id per sollicitudinem officij nostri ad debitum perducatur effectum. Exhibita siquidem nobis uestra peticio continebat, quod clare memorie Stephanus Rex Vngarie villam de Epel in Comitatu Strigoniensi existentem, ad Regem ipsum libere pertinentem, cum omnibus iuribus et pertinencijs suis, uobis et Strigoniensi Ecclesie pro remedio anime inclite recordacionis Bele Regis Vngarie, patris dicti Stephani, duxit in perpetuam elemosinam concedendam, et carissimus in Christo filius noster Ladizlaus Rex Vngarie Illustris, concessionem huiusmodi ratam habens, eam liberalitate Regia ex certa scientia approbauit, prout in patentibus litteris inde confectis, ipsorum Stephani et Ladizlai sigillis munitis, plenius dicitur contineri. Nos itaque uestris supplicationibus incliuati, quod super hoc pie ac prouide factum est, ratum et gratum habentes, id auctoritate Apostolica confirmamus, et presentis scripti patrocinio communimus. Nulli ergo omnino hominum liceat hanc paginam nonstre confirmationis infringere, uel ei ausu temerario contraire. Si quis autem hoc attemptare presumpserit; indignationem Omnipotentis Dei et Beatorum Petri et Pauli Apostolorum eius se nouerit incursurum. Datum Lugduni nonas Januarij, Pontificatus nostri anno tercio.

(Az eredeti után Knauz Nándor, Magyar Sion III. köt. 223. l.)