Elysabeth Dei gracia Regina Hungarie omnibus Christi fidelibus presentibus pariter et futuris presentem paginam inspecturis salutem in Domino. In partem Reginalis sollicitudinis accedit metiri merita singulorum, et vnicuique secundum exigenciam meritorum respondere, vt hij quorum opera singulari quodam probitatis titulo commendari merentur, dum remuneracionis beneficio prospiciunt se fecundos, de uirtute crescere studeant in uirtutes; alij quoque eorum exemplo ad operu fidelitatis exercenda prompta semper et parata beniuolencia inuitentur. Proinde ad vniuersitatis vestre noticiam harum serie volumus peruenire; quod cum Magister Jacobus fidelis noster; vir utique nobilis et honestus, domino Ladizlao Illustri Regi Hungarie karissimo filio nostro in prosperis pariter et aduersis, personam suam casibus fortune committere non formidans, gratum in feruore mere fidelitatis inpenderit famulatum: volentes eidem in reconpensacionem seruiciorum suorum, licet ampliori prouisione dignus esset, aliquali remuneracionis stipendio respondere; quasdam villas nostras duas Dubza noncupatas in Comitatu Segusdiensi sibi inuicem contiguas et vicinas, in quarum altera ecclesia Beati Martini est fundata, cum suis vtilitatibus et pertinencijs vuiuersis ipsi Magistro Jacobo et suis heredibus heredumque suorum successoribus dedimus, donauimus et contulimus perpetuo et pacifice possidendas. In cuius rei memoriam firmitatemque perpetuam presentes prefato Magistro Jacobo concessimus litteras dupplicis sigilli nostri munimine roboratas. Datum per manus Magistri Gregorij aule nostre Cancellarij fidelis nostri anno Domini MşCCş septuagesimo septimo.

(III. Endre királynak 1298-ki megerősítő privilegiumából a budai kir. kamarai levéltárban)