Excellentissimo domino suo Ladizlao Dei gracia Illustri Regi Hungarie Capitulum Nitriensis Ecclesie oraciones debitas et denotas. Litteris uestris honorabiliter receptis, ut tenemur, misimus ex nobis uirum ydoneum et fidelem; coram quo venerabilis pater dominus noster Vyncencius Dei gracia Episcopus Nitriensis homo uester per hominem suum, virum nobilem et prouidum, quandam terram Castri vestri Nitriensis Kend vocatam vacuam et habitatoribus destitutam, iuxta fluuium Radysna existentem, sub metis antiquis, quibus Castrum tenuit et possedit, Petro filio Zubuzlai, iuxta vestrum mandatum et preceptum statuit possidendam, nullo contradictore penitus existente. Datum in festo Beati Luce Ewangeliste.

(IV. László király adományleveléből mint fentebb 193. sz. a.)