(L)adizlaus Dei gracia Hungarie, Dalmacie, Croacie, Rame, Seruie, Gallicie, Lodomerie, Cumanie Bulgarieque Rex omnibus Christi fidelibus presens scriptum inspecturis salutem in omnium saluatore. Que aguntur in tempore, ne cum temporis labilitate cursu temporum elabantur, sapientum seu discretorum sollers prouidencia adinuenit, ut litterarum testimonio solidentur. Proinde ad vniuersorum noticiam harum serie uolumus peruenire, quod cum inter Thomam, Salomonem et Michaelem filios Guleus ex una parte, et Nicolaum filium Nicolai Woynade ex altera, super facto terrarum Poudharaztha et Philesharaztha uocatarum contencio fuisset susscitata, et demum easdem separandas ab inuicem et distingendas fidelibus nostris Capitulo Budensi dedissemus in mandatis, ut presente ipsorum testimonio dictas terras circuendo per ueteres metas separent ab inuicem, statuendo terram Poudharaztha uocatam Nicolao predicto, terram vero Philesharaztha filijs Guleus supradictis. Quod quidem Capitulum nobis postmodum rescripserunt, quod presente ipsorum testimonio ijdem filij Guleus terram Philesharaztha predictam separassent a terra predicti Nicolai Poudharaztha nuncupatam iuxta ueteres metas nouas erigendo, presente et non contradicente Nicolao supradicto. Nos itaque vnicuique iuri suo non deesse uolentes, dictam terram Philesharaztha reliquimus eisdem filijs Guleus perpetuo possidendam. Datum per manus discreti uiri Magistri Bartholomei Prepositi de Scepus aule nostri Vice-Cancellarij dilecti et fidelis nostri, anno Domini Mş CCş octuagesimo quarto, octauo kalendas Marcij, Indiccione duodecima, Regni autem nostri anno duodecimo.

(Eredetie bőrhártyán, melyről a pecsétnek töredéke vörös selyemzsinóron függ, a budai kir. kamarai levéltárban.)