Nos Lodomerius Dei gracia Strigoniensis Archiepiscopus et Comes Perpetuus loci eiusdem significamus vniuersis quibus expedit litterarum presentium per tenorem: quod cum inter discretos viros Magistrum Andream Doctorem Decretorum Prepositum et Capitulum Ecclesie nostre Strigoniensis, karissimos in domino fratres nostros, ab una parte; et inter mercatores de superioribus partibus Alemannie, et specialiter de Wyenna, uel eciam vndecunque per terram vel per aquam in Hungariam cum suis mercibus descendentes ab altera, exorta fuisset materia questionis super eo; quod ijdem mercatores de frugibus, videlicet de frumento, syligine, ordeo et auena, pisis, fabis, leguminibus, rapis et de alijs mercimonialibus rebus suis minuti, predictis fratribus nostris tributum soluere contentebant. Tandem nos huiusmodi questionibus inter ipsas partes finem imponere cupientes, iuramento quorumdam ciuium Strigoniensium, qui super solutione et prestacione tributi, et diuturnitate temporis cognouerunt omnimodam veritatem, hoc negocium duximus committendum. Et ijdem demum nobis aperuerunt sub religione iuris iurandi, vt dicti mercatores de omnibus mercibus suis tributum dare deberent, iuxta morem et consuetudinem aliorum. Unde nos decreuimus sentencialiter statuentes, quod omnes mercatores, sicut prediximus, in Hungariam venientes, de omnibus mercibus suis et rebus alijs mercimonialibus, cuiuscunque generis, maneriei (igy) uel speciei existant, predictis fratribus nostris iustum tributum et consuetum sine contradiccione in perpetuum soluere teneantur. In cuius rei memoriam et perpetuam firmitatem presentes litteras sigillo nostro dari fecimus communitas. Datum Strigonij anno Domini Mş CCş LXXXIV in dominica Esto Mihi.

(Az eredeti után Knauz Nándor, Magyar Sion III. köt. 469. l.)