Ladizlaus Dei gracia Hungarie, Dalmacie, Croacie, Rame, Seruie, Gallicie, Lodomerie; Cumanie, Bulgarieque Rex omnibus Christi fidelibus tam presentibus quam futuris presencium noticiam habituris salutem in Domino sempiternam. Vt collaciones Regum perpetuo robore fulciantur, debent non inmerito litterarum patrocinio communiri. Proinde ad vniuersorum tam presencium quam futurorum noticiam tenore presencium volumus peruenire, quod Comes Pous filius Merse ad nostram accedens presenciam nobis dixit conquerendo quod cum nos quandam terram drauchariorum nostrorum Batur vocatam respectu seruiciorum suorum, et duorum equorum suorum bonorum pro nostra persona valencium, nec non quinquaginta equarum suarum de equacia sua, sibi contulissemus, prout in nostro priuilegio exinde confecto plenius vidimus contineri; ipse quosdam incolas dicte terre, videlicet Farcasium et Jurk, Isep ac filios suos, Nicolaum filium Syke, nec non Symoun filium Cheet, ac cognatos ipsorum, propter temporis inpacati turbaciones et Regni nostri varia discrimina de ipsa terra deponere seu expellere nequiuisset; petens a nobis cum instancia, vt nos collacionem sibi per nos factam conseruare, et conseruando innouare, ac innouando confirmare liberalitate Regia dignaremur. Nos itaque ipsius Comitis Pous peticionibus fauorabiliter inclinati, volentesque ipsius obsequijs, et restauracione duorum equorum suorum, ut premisimus, bonorum, et quinquaginta equarum suarum per nos receptarum, occurrere Regio cum fauore: ipsam terram Batur drawchariorum nostrorum, super qua ecclesia in honore Beati Martini fundata esse dicitur, eidem Comiti Pows reli(u)quimus, tradimus et conferimus, ac collacionem ipsius factam innouando confirmamus, iure perpetuo pacifice possidendam, dantes eidem plenam auctoritatem dictos incolas ipsius terre seruando in ipsa terra si uoluerit, vel deponendi de eadem. Volentes, vt omnes littere per dictos Farcasium et socios suos seu quoslibet alios impetrate, seu instrumenta ac priuilegia optenta, uiribus careant et inania habeantur, et ubicunque exhibita fuerint, nullius sint penitus firmitatis.Vt igitur huius nostre collacionis (seriea) robur optineat perpetue firmitatis, nec possit ullo unquam tempore in irritum retractari; presentes eidem Comiti Pows concessimus litteras dupplicis sigilli nostri munimine roboratas. Datum per manus venerabilis patris Thome Dei gracia Episcopi Waciensis aule nostre Vice Cancellarij dilecti et fidelis nostri anno Domini MşCCş octuagesimo quinto pridie kalendas Junij, indiccione tredecima, Regni autem nostri anno tredecimo.

(Eredetie bőrhártyán, az egykor függött pecsét elveszett; a budai kir. kamarai levéltárban.)