Honorius Episcopus servus servorum Dei venerabili fratri... Archiepiscopo Ragusino salutem et Apostolicam benedictionem. Lecta coram nobis tua petitio continebat, quod dudum ad aures felicis recordationis Martini Pape IIII. predecessoris nostri pervento, quod Tribuniensis et Stragniensis Ecclesie Cathedrales tue provincie, metropolitico tibi iure subiecte, tanto tempore pastoribus iam vacarunt, quod earum provisio est ad Sedem Apostolicam secundum Generalis statuta Concilii legitime deuoluta; predecessor ipse dispendiis, que ex diutina vacatione imposterum Ecclesie predicte possent incurrere, per sue providentie studium intendens occurrere, ac gerens de circumspectione tua in Domino fiduciam specialem, tibi per suas dedit litteras in mandatis, ut si tibi constaret ita esse, predictis Ecclesiis, singulis videlicet singulas personas ydoneas de prudentum et religiosorum virorum consilio ea vice auctoritate sua preficeres in Episcepos et pastores, eisque ascitis tibi tribus vel duobus Episcopis, munus consecrationis impenderes, ac faceres ipsis a suis subditis obedientiam et reverentiam debitam exhiberi, contradictores per censuram ecclesiasticam appellatione postposita compescendo. Verum quia predecessor ipse, antequam predicte eius littere tibi presentate fuissent, debitum nature persoluit, nobis humiliter supplicasti, ut ne ex diutina vacatione prefate Ecclesie dispendia patiantur, providere super hoc misericorditer curaremus. Nos itaque, quibus ex iniuncto nobis Apostolatus officio sollicitudo Ecclesiarum imminet, dispendiis huiusmodi occurrere cupientes, fraternitati tue per Apostolica scripta mandamus, quatenus super premisis s auctoritate nostra procedas iuxta predictarum eiusdem predecessoris nostri continentiam litterarum. Datum Rome apud Sanctam Sabinam V. idus Martii Pontificatus nostre anno primo.

(Theiner Ágoston; Vetera Monumenta Slavorum Meridionalium historiam illustrantia I. köt. 103. l.)