Elisabeth Dei gracia Regina Hungarie vniuersis Christi fidelibus presentem paginam intuentibus salutem in omnium saluatore. Pia uotorum subsidia gratuitis decorata muneribus stabili firmitate debent esse subnixa, ut militans Dei Ecclesia, per quam Reges regnant, per Principum manus largifluas augmentari ualeat, et munificencijs ex parte eorundem optentis possit merito decorari. Proinde vniuersorum presencium futurorumque noticie harum serie uolumus fieri manifestum, quod cum post Generalem Congregacionem tocius Regni nostri in Fuen anno Domini millesimo ducentesimo octogesimo nono circa festum Beati Johannis Baptiste celebratam, de consilio domini Ladizlai illustris Regis Hungarie consortis nostri karissimi, Prelatorum et Nobilium Regni nostri, ad partes Symigienses et Tolnenses accessimus, in eisdem partibus diucius peragrantes, reuocassemusque et reuocari fecissemus vniuersas terras Reginales per quoscunque occupatas, populos nostros condicionarios in eorum condicionibus ad seruicium nobis debitum aplicari faciendo; terras seu villas deuotarum dominarum de Insula Beate Virginis Kosuk, Belch, Rakusy et Dada uocatas, in Symigiensi et Tolnensi Comitatibus existentes, quas Magister Moyus bone memorie eisdem dominabus, cum ageret in extremis, ob anime sue remedium et salutem, cum puplicis et euidentibus instrutnentis de conniuencia, beneplacito et permissione nostra contulerat, ad suggestionem quorumdam emulorum earumdem dominarum inbrigari fecissemus, officiales ipsarum spacio exigui temporis remoueri facientes ab eisdem: quia tamen eedem domine per procuratores suos legitimos cum studio sollertissimi laboris instrumenta et munimenta sua exhiberi fecerunt coram nobis, et eisdem inspectis donacionem per predictum Magistrum Moyus factam in ipsis quatuor terris seu villis Kosuk, Belch, Rakusy et Dada uocatis comperimus esse iustam, decentem, salubrem et honestam, remotis et reuocatis officialibus nostris ab eisdem villis, cum omni integritate et plenitudine suorum iurium reliquimus, reddidimus, restituimus et restitui fecimus Ecclesie Beate Virginis de Insula apud Budam, et deuotis dominabus in eadem Ecclesia degentibus et Deo iugiter famulantibus, iure perpetuo pacifice et irreuocabiliter possidendas; collacionem ipsarum possessionum per Magistrum Moyus bone memorie factam, ratam, gratam habentes et acceptum, renunciantes auctoritate presencium omni iuri Reginali, si quod nos quocunque modo in factis predictarum possessionum Kosuk, Belch, Rakusy et Dada uocatarum contingere posset ad presens, uel eciam in futurum, cum in donacionibus Ecclesijs Dei, presertim religiosam vitam ducentibus, factis, et temporaliter et spiritualiter non inmerito sperenlus gratulari. Vt igitur huius nostre donacionis seu collacionis series robur optineat perpetue firmitatis, nec processu temporum ualeat per quempiam in irritum retractari, presentes concessimus litteras duplicis sigilli nostri munimine roboratas. Datum per manus Venerabilis fratris domini Benedicti Episcopi Wesprimiensis, aule nostre Cancellarij fidelis nostri; anno Domini millesimo ducentesimo nonagesimo.

(Eredetie bőrhártyán, melyről a sárga-zöld selyemzsinóron függött pecsét elveszett.; a kir. budai kanarai levéltárban.)