Nicolaus Episcopus servus servorum Dei, venerabili fratri Lamberto Episcopo Veglensi salutem et Apostolicam benedictionem. Vacante dudum Veglensi Ecclesia per obitum bone memorie Marini Veglensis Episcopi, due fuerunt electiones a Canonicis ipsius Ecclesie, una videlicet de fratre Johanne de Vegla Minorum, et altera de fratre Zacharia Predicatorum fratrum Ordinum, in discordia celebrate. Huiusmodi vero electionum negotio ad Sedem Apostolicam devoluto, cum dicti Electi infra tempus a iure statutum, et etiam post ad eandem Sedem accedere non curarent pro huiusmodi electionum suarum negotio prosequendo, nos ipsos in audientia publica citari fecimus, ut ad prosequendum ius, si quod eis in electionibus huiusmodi competebat, certo termino comparerent: et demum cum nullus illorum ad hec comparere curaret, pronuntiavimus ipsos a iure, si quod eis competebat ex eisdem electionibus, cecidisse. Deinde vero, ne dicta Ecclesia ulterius viduitatis incommoda deploraret, et de pastore ydoneo providere volentes, ad personam tuam, morum honestate decoram, litterarum scientia preditam, in spiritualibus providam, in temporalibus circumspectam, ac aliis virtutum donis multipliciter commendatam, direximus oculos nostre mentis; illam fore perutilem ad ipsius Ecclesie regimen arbitrantes. Eapropter te Ordinem Fratrum Minorum professum, de fratrum nostrorum consilio, eidem Ecclesie in Episcopum prefecimus et pastorem, (tibi) curam et administrationem ipsius Veglensis Ecclesie spiritualiter et temporaliter conmittendo; firma de te concepta fiducia, quod dirigente Domino per actus tuos inibi cultus Divinus augebitur, et eadem Ecclesia per tue circumspectionis industriam in spiritualibus et temporalibus prospere dirigetur, et salubria, dante Domino, suscipiet incrementa. Reverenter igitur suscipe iugum Domini, et suavi eius oneri humiliter colla flecte, manumque mittens ad fortia ipsius Veglensis Ecclesie administrationem exequi studeas diligenter, et gregis tibi in ea commissi custodiam prosequaris sollicite ac prudenter, ut laudabili de ipso in die iudicii reddita ratione, una cum eis eterni patris regnum, ab origine mundi preparatum electis, merearis accipere, ac dilecta Domini tabernacula possidere. Datum Rome apud Sanctam Mariam Maiorem VIII. idus Martii, Pontificatus nostri anno tertio.

In e. m. Capitulo Ecclesie Veglensis, Clero et populo Civitatis et Diocesis Veglensis.

(Theiner, Vetera Monumenta Slavorum Meridionalium historiam illustrantia I. köt. 107. l.)