Ladizlaus Dei gracia Rex Hungarie fidelibus suis Judici, Consiliarijs et toti Communitati Tragurij. Quia nobis semper fidelitatis opera exhibuistis indefesse, vos Regio cum fauore prosequimur. Sed quia propter guerrarum discrimina ad partes illas accedere nequimus vsque modo: scire volumus fidelitatem vestram, quod in breui ad vos talem hominem destinamus, qui vos tam a Paulo, qui vicem gerit pro Bano Maritimo, quam a ciuibus Spalati et de Sibenigh, ac alijs omnibus vos molestantibus, defensabit. Misimus eciam eis litteras nostras, vt a molestacionibus et grauaminibus vobis inferendis desistant penitus, et eciam conquiescant. De damnis siquidem vestris iusticiam fieri faciemus pleniorem, prout exigit ordo iurium. Petimus namque, et fidelitati vestre firmiter mandamus precipientes, quatenus a fidelitate consueta non recedeutes, nobis fidelitatem debitam obseruetis; vt nos fidelitatem vestram possimus non immerito commendare. Datum Bude tercio die Sancti Laurencij martiris.

(Lucius, Memorie storiche di Trau 92. l.)