Excellentissimo domino suo L. Dei gracia Regi Vngarie frater Symon miseracione Diuina Abbas Monasterij Beati Adriani de Zala totusque Conuentus eiusdem loci oraciones continuas debitas ac deuotas. Receptis litteris Vestre Serenitatis continentes, quod mitteremus vnum ex nobis cum homine uestro, qui citaret ad Vestram Presenciam Jacobum de Tolmach, Gallum, Cosman et Chemen filios eiusdem, Paulum filium Manas, Helya et Cham filios Hernek, Propicium de Perene, Thomoy et Ladizlaum de Thomoy, villasque eorundem Tholmach et Perene uocatas, contra Mychaelem filium Varo ad terminum competentem. Quod et fecimus, et homines predictos ad Presenciam Vestre Mayestatis citari fecimus, terminum eisdem assignantes quindenam Beate Mar garete. Et quod Vestra Excellencia nobis precepit, vt de iniurijs, quas homines supradicti eidem Mychaeli intulissent, ueritatem sciremus, et uobis mandaremus; taliter ueritatem sciuimus per hominem nostrum: quod homines supra nominati manu armata supra domum eiusdem Mychaelis uenientes, fratrem eiusdem Dominicum nomine interfecerunt, ipsum uero et Achillem fratrem ipsius alterum grauiter uulnerarunt; ecclesiam ipsius fregerunt, auferentes inde quicquid ibidem repererunt; patrem ipsius captiuari fecerunt Thomoy et Ladizlaus, fratremque eiusdem, quos redemit; molendinum ipsius destruxerunt; siluam et fenile ipsius tenent; metas terre eiusdem in duobus locis drestrucserunt (igy), mortem eidem a meridie minantes, interficientes insuper quendam cognatum eiusdem nomine Johannem filium Heches. Datum secundo die post festum Beate Margarete.

Kivül: Excellentissimo domino L. Dei gracia. - - -

(Eredetie bőrhártyán, a zárpecsét elveszet; a budai kir. kamarai levéltárban.)