(A)ndreas Dei gracia Hungarie, Dalmacie, Croacie, Rame, Seruie, Gallicie, Lodomerie, Cumanie Bulgarieque Rex omnibus Christi fidelibus presentem paginam inspecturis salutem in omnium saluatore. Ad vniuersorum noticiam tenore presencium uolumus peruenire, quod consideratis fidelitatibus et seruiciorum meritis Depreht filij Kunt, Villici Posoniensis, fidelis nostri, que nobis post adepta gubernacula nostri regiminis exhibuit etimpendit, quandam terram Castri nostri Posoniensis Kuhna uocatam, uacuam et habitatoribus destitutam, in qua ecclesia in honore Sancti Nycolai est constructa, per dominum Belam Regem clare memorie, auum nostrum karissimum ei collatam, et per ipsum Depreht usque modo possessam, ipsi Depreht, et per eum suis heredibus heredumque suorum successoribus dedimus, donauimus et contulimus iure perpetuo pacifice possidendam, sine preiudicio iuris alieni, secundum quod per dominum Belam Regem auum nostrum karissimum ipsi Depreht donata dinoscitur et collata. In cuius rei memoriam et perpetuam firmitatem presentes concessimus litteras dupplicis sigilli nostri munimine roboratas. Datum per manus discreti viri Magistri Theodori Albensis Ecclesie Prepositi aule nostre Vice Cancellarij dilecti et fidelis nostri, anno Domini M°CC° nonagesimo primo quinto kalendas Nouembris Regni autem nostri anno secundo.

(Eredetie bőrhártyán, melyről vörös-sárga selyemzsinóron a pecsét töredéke függ; a budai kir. kamarai levéltárban.)