Johannes Diuina miseracione Spalatensis Archiepiscopus, tocius Dalmacie, Croacie, Sclauonieque Primas venerabili fratri domino N(icolao) per eandem Episcopo Scardonensi salutem in Domino. Testante Sacro Concilio anno preterito in Spaleto celebrato, ordinasse ac firmiter precepisse recolimus, quod nullus suffraganeorum nostrorum in preiudicium alterius Diocesis ad sacros ordines promouere, aut alia ecclesiastica et episcopalia sacramenta ministrare presumat, sub pena D librarum; sed sue Diocesis finibus sit contentus. Quod preceptum et tam salubre statutum venerabilis frater noster G(regorius) Dei gracia Traguriensis Episcopus in festo Beati Dompnij presentibus nostris suffraganeis, in vniuerso Clero vos infregisse grauiter nobis est conquestus; dicens, vos Sibenicenses clericos ad sacros ordines promouisse, ac eis crisma contulisse, nec non baptisma paruulorum, ac alia sacramenta ecclesiastica et episcopalia celebrasse in sui preiudicium et grauamen; cum dicti clerici Sibenicenses et totum Sibenicum subiecti sint de iure Episcopo et Episcopatui Traguriensi; excusantes vos omnia supradicta nostro mandato et auctoritate fecisse. Hanc totam suam querimoniam nobis inpingendo et contra nos conuertendo, plurimum nobis, quin pocius supra modum debitum extitit infestus et molestus, tanquam grauiter sauciatus et afflictus. Et si bene recolitis, cum nuper in societate Pauli Bani ad nos accessistis, super eodem facto non solum a Traguriensibus, sed eciam a Spalatensibus grauissimas lamentaciones, et terribiles conquestiones, in presencia domini Potestatis Spalatensis, et omnium nobilium Spalati, non absque magno nostri cordis dolore, et multi certaminis agone, opprobria eciam contra nos rigida et dura, aspera et molesta appellacione audiuimus. Super quibus omnibus grauiter afflicti et perturbati, ad iustanciam et preces multas omnium suffraganeorum nostrorum, qui presentes in festo Sancti Domnij extiterunt; taliter vestre fraternitati scribimus, et per hoc presens scriptum nostrum firmiter et destricte precipimus et precipiendo mandamus, quatenus in antea, (si) graciam Beati Domnij et nostram caram habetis, et dicti Concilij penam vultis effugere, supradicta nullatenus attemptetis, et in predictis nullatenus excedatis. Alioquin indignacionem Beati Domnij et nostram, ac supradicti Concilij penam, si contra feceritis, procul dubio incurretis. Data Spaleti in palacio Archiepiscopali die Martis XII. Madij infra octauas Beati Dompnij, indiccione sexta.

(Lucius, Memorie storiche die Trau 134. l.)