Omnibus Christi fidelibus presentem paginam habituris frater Georgius Prior et Conuentus Cruciferorum Sancte Trinitatis de Calidis Aquis salutem in omnium saluatore. Ad vniuersorum tam presencium quam futurorum noticiam harum serie volumus peruenire: quod Thomas filius Thome dicti Kabas de Zecheu conciuis noster de eisdem videlicet Calidis Aquis, coram nobis personaliter comparendo, quandam particulam de vinea sua, existentem in promontorio ville Sancti Jacobi in Wymal vocato, continentem tria iugera terre, vicinam et conterminalem vinee eiusdem Thome ab vno latere, et vinee Gerung pistoris ciuis Castri Budensis ex alio, cum terra inculta pertinenti ad eandem particulam vinee per iam dictum Thomam vendite, de consensu et bona voluntate domine consortis sue, cognatorum suorum et omnium generacionum suarum, ymo penitus nullo contradictore comparente, pro quatuor marcis plene habitis et receptis, Lazk de Veteri Buda, similiter et presencialiter conparenti, et per eum suorum heredum successoribus iure perpetuo et inreuocabiliter tenendam et habendam vendidisse est confessus. Assumendo idem Thomas filius Thome ipsum Lazk et suos heredes ab omnibus racione dicte particule vinee et terre inculte molestare seu inquietare volentibus proprijs laboribus et expensis, secundum vsum et consuetudinem ab antiquo approbatam, expedire et liberare. In cuius rei memoriam perpetuamque firmitatem ad iustanciam et peticionem parcium nostras concessimus litteras sigilli nostri munimine roboratas. Datum anno Domini M°CC° nonagesimo quinto.

(Eredetie bőrhártyán, melyről fehér selyemzsinóron az ép pecsét függ; a budai kir. kamarai levéltárban.)