Damus pro memoria, quod cum iuxta continenciam priorum litterarum nostrarum memorialium, tercio die octauarum Epiphaniarum Domini Petrus Decanus, uel Johannes Curialis Comes, aut unus trium Procuratorum Ecclesie nostre Strigoniensis, contra Nicolaum aurifabrum, Ciuem Strigoniensem, Strigonij in Capella nostra debuisset iuramentum deponere super eo, ut idem Nicolaus aurifaber pensionem terre eorundem fratrum nostrorum inter clausuram aque Toplicha constitute, eisdem fratribus nostris a quadriennio negligenter et contumaciter non dedisset, videlicet unciam regalium et usualium monetarum; ipso die iuramenti adueniente, que incidit in die Dominica, licet idem Comes Johannes, presentibus Magistro Cypriano Lectore Strigoniensi, et Folkomario Sacerdote, ipso Nicolao aurifabro astante, presencialiter in loco eiusdem iuramenti paratus esset iurare: Nos tamen propter diei dominice sollempnitatem ipsum iuramentum ad crasti num diem duximus ex nostro officio prorogandum; quo die postmodum coram Dominico Sacerdote Capellano nostro et homine ad hoc specialiter deputato, in nostra Capella iurauit modo et ordine supradictis. Propter quod ipsum a iure conduccionis et locacionis dicte terre decreuimus merito cecidisse, et si quid iuris in hoc habebat, eciam amisisse, iuxta tenorem premissarum memorialium litterarum, continencium iudicij nostri formam. Item Magister Thomas Prepositus Strigoniensis et Magister Anyanus Notarius, nomine suo et vice omnium eorundem fratrum nostrorum Capituli Strigoniensis a crastino die deposicionis eiusdem iuramenti sex diebus continuis astiterunt in termino coram nobis contra eundem Nicolaum aurifabrum, qui non venit ad nostram presenciam, neque misit; quamquam nos post expedicionem eiusdem iuramenti super facto uerberum et uulnerum, tam uirorum, quam mulierum, iobagionum eiusdem Capituli de Uilla Noua circa ecclesiam Sancti Dominici constituta, et uerbalium iniuriarum, nec non super facto occupacionis terre eorundem fratrum nostrorum, inter vineam Pentek et inter eandem ecclesiam Sancti Dominici existentis et per plantacionem vinee occupate, inter easdem partes iudicium facere debuissemus; prout hoc in prioribus nostris litteris plenius et expressius continetur. Datum Strigonij septimo die termini prenotati.

(Az eredeti után Knauz Nándor, Magyar Sion III. köt. 938. l.)