Omnibus Christi fidelibus tam presentibus quam futuris presens scriptum inspecturis Capitulum Ecclesie Agriensis salutem in omnium saluatore. Ad vniuersorum noticiam tenore presencium volumus peruenire, quod Comite Tyburcio, et Alexandro filio Johannis fratre eiusdem de Keer ex vna parte; Nycolao officiale Petri et Jule filiorum Reynoldy quondam Palatini pro ipsis dominis suis ex altera, coram nobis personaliter constitutis, prefati Comes Tyburcius et Alexander proposuerunt viua voce; quod totam porcionem eiusdem Alexandri in terra Zakula vocata existentem, quam ordine judiciario ab ipsis filijs Reynoldi requirebant, cum vniuersis vtilitatibus et pertinencijs suis, receptis quatuordecim marcis ab eisdem filijs Reynoldy pro eadem, ipsis filijs Reynoldy et suis heredibus reliquissent perpetuo possidendam et habendam. Insuper obligarunt se ijdem Comes Tyburcius et Alexander, ac heredes suos, dictos filios Reynoldy et heredes eorundem ab omnibus racione prefate porcionis impetere nitentibus defendere et expedire proprijs laboribus et expensis. In cuius rey testimonium ad instanciam parcium presentes concessimus sigilli nostri munimine roboratas. Presentibus tamen Magistro Johanna Lectore, Mykow Custode, Martino de Patha, Petro de Kemey, Magistro Johanne de Heues Archidiaconis et alijs multis; anno Domini M°CC° nonagesimo sexto. Regnante Andrea Illustri Rege Hungarie; Lodomerio Strigoniensi, Johanne Colocensi Archiepiscopis; domino nostro venerabili patre Andrea Dei gracia Episcopo Agriensi existentibus.

A B C

(Eredetie bőrhártyán, melyről a pecsét sárga-vörös selyemzsinóron függ a budai kir. kamarai levéltárban.)