Bonifacius Episcopus servus servorum Dei dilecto filio fratri Henrico de Tuderto Ordinis fratrum Minorum professori, Electo Jadrensi, salutem et Apostolicam benedictionem. Romani Pontificis, quem celestis pastor et episcopus animarum, potestatis sibi plenitudine tradita Ecclesiis pretulit uniuersis, plena curis et onusta vigiliis sollicitudo requirit, ut circa cuiuslibet statum Ecclesie sic ipse solerter invigilet, prudenter excogitet ac prospiciat diligenter, ut per eius circumspectionem providam et providentiam circumspectam Ecclesiis singulis pastor accedat ydoneus et rector providus deputetur; quatenus ipse superni fauoris opitulante elementia letis foveantur eventibus, et votive prosperitatis successibus gratulentur. Sane Jadrensi Ecclesia per translationem venerabilis fratris nostri Johannis Tranensis, tunc Jadrensis Archiepiscopi, ad Tranensem Ecclesiam per nos factam nuper solatio destituta pastoris, Nos ad eiusdem Jadrensis Ecclesie quietum statum et prosperum paterne sollicitudinis studio intendentes, ordinationem et dispositionem ipsins hac vice provisioni Sedis Apostolice duximus reservandam, decernentes extunc irritum et inane, si secus super hoc scienter vel ignoranter per quemcumque seu quoscumque contingeret attemptari. Volentes igitur, prout ad nostrum spectat officium, obviare dispendiis, que passent ex prolixe vacationis instantia eidem Jadrensi Ecclesie imminere, considerantes etiam probitatis merita graudia et virtutum dotes multiplices, quibus dono Superni Numinis nosceris insignitus, et propterea spem gerentes indubiam, firmamque fiduciam obtinentes, quod per tue landabilis circumspectionis industriam, cum te celebris fame preconium referat, quod multorum relatio fidedigna confirmat, in spiritualibus et temporalibus circumspectum, prefata Jadrensis Ecclesia, Deo favente, proficiet in utrisque: deliberatione cum fratribus nostris super hoc habita diligenti, te Ordinis fratrum Minorum professorem iam dicte Jadrensi Ecclesie de fratrum predictorum consilio, et Apostolice plenitudine potestatis preficimus in Archiepiscopum et pastorem, curam et administrationem ipsius tibi in spiritualibus et temporalibus committentes, firma concepta fiducia, quod dirigente Domino actus tuos eidem Jadrensi Ecclesie per tuam curiosam solertiam, tuumque ministerium studiosum honoris et prosperitatis multiplicis, Deo propitio, desiderata provenient incrementa. Ideoque discretioni tue per Apostolica scripta mandamus, quatenus nostris et Apostolice Sedis beneplacitis sub prompte humilitatis officio te coaptans, et reverenter suscipiens inpositum a Domino tibi onus, eiusdem Jadrensis Ecclesie curam sollicitam gerere studeas, eiusque vacare profectibus non omittas, gregem dominicum tue in illa discretioni commissum doctrina verbi et operis informando; ita quod Ecclesia per tue diligentie studium laudabilibus in spiritualibus et temporalibus ad Diuini Nominis gloriam proficiat incrementis. Datum Apud Urbemveterem XIV. kalendas Julij, Pontificatus nostri anno tertio.

In em. Patriache Gradensi, uniuersis Jadrensis Ecclesie Suffrageneis, Capitulo Ecclesie Jadrensis, clero et populo Ciuitatis et Diocesis Jadrensis; nobili viro Duci Venetorum, et vniuersis Jadrensis Ecclesie Vassalis.

(Theiner, Vetera Monumenta Slavorum Meridionalium historiam illustrantia. I. köt. 114. l.)