Bonifacius Episcopus seruus seruorum Dei venerabili fratri... Archiepiscopo Strigoniensi salutem et Apostolicam benedictionem. Dilectorum filiorum... Abbatis et Conuentus Monasterij Sancti Martini de Sacro Monte Pannonie ad Romanam Ecclesiam nullo medio pertinentis Ordinis Sancti Benedicti Jauriensis Diocesis presentata nobis petitio onusta querelis grauibus continebat, quod nobiles viri Johannes, Nicolaus et Henricus filij quondam Henrici Bani, Erricus cognatus eorundem nobilium, Saul Sauli, Laurenta natus Sauli, Mattheus Petri Palatini, Paulus de Comaran, Johannes Zat et nonnulli alij nobiles, Comites, Barones, milites Strigoniensis, Jauriensis et Vesprimiensis Ciuitatum et Diocesum in ipsos et dictum Monasterium hostili suicia consurgentes, eos varijs lacessitos iniurijs et iacturis oppressos ab ipsis decimis, grangijs, castris, villis, terris, possessionibus, quibusdam tributis et rebus alijs ipsius Monasterij spoliare nequiter, ipsaque bona occupare et occupata detinere nequius presumpserunt et adhuc detinere presumunt, in eiusdem Abbatis et Monasterij non modicum preiudicium et grauamen. Quare dicti Abbas et Conuentus super hoc ad remedium Sedis Apostolice recurrentes, nobis humiliter supplicarunt, vt cum ipsi propter potentiam et malitiam ipsorum nobiliumet aliorum non sperent coram eorum ordinarijs super his posse assequi iusticie complementum, prouidere eis super hoc de oportune prouisionis remedio dignaremur. Nos qui occurrere grauaminibus subditorum et ipsorum quieti consulere delectamur, eisdem Abbati et Conuentui adesse in hac parte fauorabiliter cupientes, de tua circumspectione confisi fraternitati tue per Apostolica scripta mandamus, quatenus euocatis qui fuerint euocandi, postquam de plano sine strepitu et figura judicij legitime constiterit de premissis, predictos nobiles et alios ex parte nostra moneas efficaciter et inducas, vt infra certum terminum peremptorium, quem eis prefixeris, premissa bona sic occupata restituant plenarie Abbati et Conuentui memoratis, et de iniurijs eis illatis satisfaciant competenter. Si vero ijdem nobiles et alij infra eundem terminum contempserint huiusmodi monitioni parere, tu extunc eos ad id per censuram ecclesiasticam appellacione remota compellas; testes autem, qui fuerint nominati, si se gracia, odio vel timore subtraxerint, censura simili appellatione cessante compellas veritati testimonium perhibere, non obstante constitutione per nos edita, qua cauetur, quod nullus per nostras litteras extra suam Ciuitatem et Diocesim ad iudicium euocetur, nec procedatur in aliquo contra eum. Datum apud Urbemueterem V. kalendas Julij Pontificatus nostri anno tertio.

(Eredetie bőrhártyán, a pannonhalmi főapátság levéltárában.)