Nos Lodomerius miseracione Diuina Archiepiscopus Strigoniensis et Comes perpetuus loci eiusdem memorie commendantes significames quibus expedit vniuersis, presencium per tenorem; quod cum discretus vir Magister Marcellus, Custos Ecclesie nostre Strigoniensis, contra Ladizlaum Beatorum Cosme et Damyani, Gregorium Beati Johannis Apostoli et Ewangeliste, et Dominicum Sancte Michaelis de Koachy Ecclesiarum presbiteros coram nobis mouisset materiam questionis, dicens eosdem quibusdam quantitatibus siue marcis candelarum ex antiqua consuetudine sibi sue racione Custodie teneri, et diucius inter eos fuisset altercatum; tandem partes de amicabili composicione proborum virorum, specialiter Jacobi Cantoris, et quorundam aliorum ex fratribus nostris, dixerunt taliter inter se extitisse ordinatum; ut Ladizlaus, Gregorius et Dominicus, predictarum Ecclesiarum presbiteri, uel eorum successores in ipsis Ecclesiis pro tempore constituti, amodo in posterum singuli ipsorum annis singulis eidem Marcello Custodi, uel successori suo in Ecclesia nostra Strigoniensi, pro tempore similiter constituto, quantitates, siue singulas quinque marcarum candelas, sine refragacione qualibet perpetuo, pacifice et plenarie dare et soluere tenerentur. Datum Strigonij in crastino Beati Wincencij martiris, anno Domini M° ducentesimo nonagesimo septimo.

(Az eredeti után Knauz Nándor, Magyar Sion III. köt. 942. l.)