Bonifacius Episcopus servus servorum Dei venerabili fratri Jacobo Archiepiscopo Jadrensi, salutem et Apostolicam benedictionem. Cum palleum, insigne videlicet pontificalis officii, a nobis cum ea, qua decuit, instantia postulasses; Nos tuis 337supplicationibus annuentes, ipsum de corpore Beati Petri sumptum tibi per dilectos filios nostros Matheum Sancte Marie in Porticu, Neapoleonem Sancti Adriani, Petrum Sancte Marie Nove, et Richardum Sancti Eustachii Diaconos Cardinales duximus assignandum, prestito a te nostre et Ecclesie Romane nomine fidelitatis solite iuramento, ut illo intra Ecclesiam tuam illis diebus utaris, qui expressi in ipsius Ecclesie privilegiis continentur. Ut signum igitur non discrepet a signato, sed quod geris exterius, intus serves in mente; fraternitatem tuam monemus attentius et hortamur, quatenus humilitatem et iustitiam, dante Domino, qui dat munera et premia elargitur, observare studeas, que suum servant et promovent servatorem, et Jadrensem Ecclesiam sponsam tuam cures sollicite, actore Domino, incrementis in spiritualibus et temporalibus ampliare. Datum Anagnie kalendis Julii, Pontificatus nostri anno quinto.

(Theiner, Vetera Monumenta Slavorum Meridionalium historiam illustrantia I. köt. 116. l.)