Petrus Gradonico etc. nobilibus et sapientibus viris Potestati, Consilio et Communitati Tragurij, amicis dilectis salutem et dileccionis affectum. Recepimus vestras litteras, per quas inter cetera nos rogastis, quatenus placeret nobis per causas in ipsis litteris annotatas terminum vnius mensis et dimidij, quem vobis prefiximus ad soluendum libras trecentas paruorum, in quibus estis nobis pro Comite Georgio obligati, prorogare vsque ad Comitis Georgij reditum de partibus Apulie; et tunc intendebatis satisfacere. Ad quarum significata Prudencie vestre duximul tenore presencium responciendum quod ipsam pecuniam, que a vobis et alijs Ciuitatibus Dalmacie debet exigi, non debet in nostrum Commune recipi, nec haberi; sed de ipsa debet satisfieri multis nostris fidelibus, damnificatis grauiter iam et diu per Almissanos; quibus damnificatis mora ellet intollerabilis. Itaque ipsorum damnificatorum necessitas nos constringit taliter, quod non possumus amplius expectare. Vnde Prudenciam vestram rogamus attente, quatenus debeatis celeriter dictam summam dare nostro Comiti Jadre; ante videlicet quam procedatur ad pignorandum vestros, vbicumque poterunt in partibus nostri Dominij reperiri. Nam sicut scitis, pluries vos requisiuimus; et terminus prefixus vobis ad modo est transactus. Datum die XXVI. Marcij XIII. indiccione.

(Lucius, Memorie Storiche di Trau 140. l.)