Andreas Dei gracia Hungarie, Dalmacie, Croatie, Rame, Servie, Gallicie, Lodomerieque Rex in perpetuum. Immensa Regum dapsilitas licet nullis dandi limitibus coharctari debeat, ad illos tamen diligencius munificencie sue dona debet extendere, qui et temporalium bonorum impensu sibi fideliter obsecuntur, et in offerendis oracionum sacrificiis pro pace Regis et Regni, Deo jugiter ac devote famulantur. Cum itaque curis et defectibus Ecclesiarum omnium in Regno nostro Christo militancium earum tamen maxime, que ad nos speciali patronatus iure pertinent, diligentem apponere providenciam debeamus; Zagrabiensis Dioecesis Monasterium, per nostrum antecessorem sanctum Ladislaum Regem immortalis memorie fundatum, postmodum autem multorum elapsu temporum divina sic disponente gracia nostri patronatus suffragio dedicatum, temporali commercio volentes eterna metere, huiusmodi largicionis stipendio liberalitate Regia in perpetuum dotavimus: quatenus salinarii super Marisii fluvium constituti de salibus aquaticis, eiusdem Ecclesie Canonicis et non Episcopo, valens quinquaginta marcas de salibus in loco qui vocatur Zegedin, annuatim ante festum Sancti Regis Stephani persolvere teneantur, ac iam dictis Canonicis usque Zagrabiam absque omni tributo deportandis, et cum omnimoda libertate, si eis expedierit vendicioni exponendis. Verum quia rei geste memoria facili lapsu mortalium mentes deserit, et que pia fidelium disponit sedulitas in sopito malignancium impulso quandoque contigit vacillare, ut hoc a nobis pro nostrorum remissione peccatorum, Divine pietatis intuitu, legitime facta largicio non per salinarios, non per quempiam alium alterari vel retractari valeat, huius execucionem negocii vice nostra, Sancte Colocensis Ecclesie Archiepiscopo commisimus, ita videlicet, ut excluso quolibet salinariorum et aliorum quorumlibet gravamine, sumpmam iam dicte pecunie quolibet anno plene faciat adimpleri. Et ut hec per omnia successorum nostrorum tempora salva semper et inconcussa permaneant, presentem concessimus paginam sigilli nostri munimine in perpetuum roboratam. Datum per manus Hugrini Aule Regie Cancelarii, anno ab Incarnacione Domini MCCXVII. Venerabili Johanne Strigoniensi, Reverendo Bertholdo Colocensi Archiepiscopis existentibus, Calano Quinqueecclesiensi, Desiderio Chanadiensi, Vilhelmo Transylvano, Roberto Wesprimiensi, Simone Varadiensi, Petra Geurinensi, Jacobo Vaciensi, Stephano Zagrabiensi, Thoma Agriensi Electo, Episcopis Ecclesias feliciter gubernantibus. Jula Palatino, Dyonisio Magistro Tavarnicorum et Comite Novi castri, Bancone Bano, Ochuz Curiali Comite, Raphoyn Voywoda ceterisque Comitibus Comitatus tenentibus. Regni nostri anno tercio decimo.

(Tkalcsics, Monum. Hist. Episc. Zagrabiensis I. köt. 46. l.)