Andreas Dei gracia Hungarie Rex vniuersis Christi fidelibus presentem paginam inspecturis salutem et omne bonum. Vniuersorum Sancte Matris Ecclesie filiorum noticie insinuacione presencium uolumus fieri manifestum, quod nos considerato grauamine et oppressione populorum Ecclesie Strigoniensis, qui a diuersis iudicibus eis inferebantur, mira moti benignitate Regia, ad peticionem Venerabilis R. Archiepiscopi Strigoniensis ab omnium Judicum iurisdiccione eosdem populos eximentes, concessimus eisdem et instituimus; ut nullius Judicis, uidelicet nec Palatini, nec alicuius alterius judicio astare teneantur, preter nostrum solummodo proprium Judicium; et nullus ipsos ante aliquem alium judicem presumat conuenire, nisi coram Nostre Maiestatis Presencia. Vt autem hec a nobis facta exempcio nec nostris unquam, nec nostrorum successorum temporibus ualeat reuocari uel retractari, sed salua semper et inconcussa remaneat, in argumentum fidei maioris presentem concessimus paginam dupplicis sigilli nostri munimine roboratam. Datum anno Gracie millesimo CC°XXXII°. Regni autem nostri anno vicesimo nono.

(Knauz Nándor, Magyar Sion II. köt. 291. l.)