A B C D

Andreas Dei gracia Rex Hungarie omnibus presens scriptum inspecturis salutem et omne bonum. Vniuersitatj vestre notum fieri volumus, quod cum hospites Teothonicj in villa Zebehleb commorantes pro eo, quod multas iniurias dampna plurima fratribus Ecclesie Strigoniensis intulerant, et eis rebelles extiterant, et per Judicium nostrum, et de mandato nostro fuissent expulsi de iure et eiectj de villa prenominata, que cum omnibus siluis et alijs pertinencijs suis ad dictos fratres noscitur pertinere; tandem dicti fratres motj misericordia dictos hospites Teothonicos receperunt in villa memorata, tali condicione et composicione inter partes ordinata et firmata: promiserunt dicti Teothonici prestito iuramento, quod nec facto nec consilio uenient contra fratres Ecclesie memorate; sed ei fideles erunt in omnibus; et si quis ullo tempore uellet super dicta villa contra dictam Ecclesiam mouere questionom, ipsi pro posse suo Ecclesiam et Canonicos adiuuabunt. Et ad hec omnia obseruanda se sub talj pena obligarunt: quod si hanc composicionem infregerint, omnia bona ipsoram tam mobilia quam immobilia, tam presencia scilicet quam futura, ad Ecclesiam sepedictam sine aliqua contradiccione et excepcione deuoluantur; et super hoc omnj excepcionj et omny iurj renunciarunt. Porro pro unoquoque aratro soluent dictj hospites annuatim dimidiam marcam argentj, et cuilibet aratro debent centum et deccm iugera assignari cum eadem mensura, qua proxima villa, scilicet Lengen, solet suos agros mensurare. Fontem eciam uel riuulum causa habitandi uel agros colendi non transibunt. Item predictos Canonicos uel eorum procuratores, quociescumque ad ipsos accedent, benigne excipient, et eos honeste procurabunt. Si vero siluam extirpauerint et fecerint terram arabilem, similiter sicut de reliqua terra pro quolibet aratro soluent fratribus dimidiam marcam, sicut prius est expressum. Si quis hospitum domum habuerit, terram autem arabilem non habeat, soluat fratribus tria pondera annuatim; et omnes iste pensiones in festo Sanctj Martinj debent soluj. Pret rea dictj populi, si eis placuerit, Teothonicum habeant sacerdotem, qui a Teothonicis morantibus ultra fontem recipiat decimas et oblaciones; ab aliis vero, si qui sunt uel erunt citra fontem, siue sint Hungari, siue Sclauj seu Teothonicj, percipiat quartam quarte decimarum; et annuatim in festo Sanctj Martinj Capitulo Strigoniensj vnam marcam et dimidiam argentj, et Cantori Strigoniensi vnam marcam argentj soluere teneatur. Preterea prefatj hospites sibi eligant uillicum, qui causas ipsorum discuciat et iudicet. Et si qua causa grauior emerserit, que maiorem requirat judicem; discuciat eam vna cum aliquo de Canonicis, quem fratres miserint ad hoc faciendum; et de iudicio huius cause, quam sine procuratore Capituli non poterint iudicare, ipse habeat dimidiam partem, et Capitulum alteram dimidiam. Sed in ceteris causis minoribus totum iudicium percipiat idem Judex. Naturalem cursum riuulj nullus possit uel debeat immutare. Nos igitur dictam composicionem approbantes, ad peticionem utriusque partis, que propter hoc ad nos accessit, et omnia premissa coram nobis protestata est et confessa, in testimonium huius rei presentes concessimus litteras duplicis sigilli nostri munimine roboratas; decisas per alfabetum, quarum unum par fratres habeant Strigonienses, aliud vero par Teothonici uille pretaxate. Anno Verbi Incarnati M°CC°XXXIII°, Regni autem nostri tricesimo.

(Az eredeti után Knauz Nándor Magyar Sion II. köt. 373. l.)