A B C

In nomine Sancte Trinitatis et Individue Unitatis. Universum Zagrabiense Capitulum omnibus Christi fidelibus presens scriptum cernentibus salutem in actore salutis. Quoniam ea, que aguntur, a memoria hominum sepissime delet oblivio, necessario provisum est, ut ea, que inter viros religiosos ordinantur vel statuuntur, posterorum memorie scripti patrocinio transmittantur. Hinc est quod ad universorum tam modernorum quam futurorum noticiam harum serie volumus pervenire: quod cum Abbas et Conventus Monasteriii de Toplica iam dudum postulassent a fratre Rembaldo de Karump, Magistro Domus Templi per Regnum Hungarie, et ab aliis Fratribus Domus Templi, locum unum apud Sceingniam sibi dari, ad domum unam ibidem edificandam pro rebus propriis et necessariis dicti Monasterii emendis et vendendis. Demum dicti Magister et fratres congregati ad Generale Capitulum apud Glogonicam IV. idus Marcii, peticionem dictorum Abbatis et Conventus unanimes duxerunt admittendam, donantes et concedentes in perpetuum dicto Monasterio Toplicenci medietatem cuiusdam pecie terre, quam tenebat Domus Templi de terra quam tenuit quondam Prior Oprahk, ad domum quam petebant edificandam, tali modo: quod dictus Abbas et Conventus in pertinenciis Sceingnie non possint in posterum emere, nec in elemosinam recipere, si fortassis eis ab aliquo conferretur, domum aliquam, neque vineas neque possessiones aliquas seu terras, sine licentia Magistri et fratrum Domus Templi. Quod si alicuius privilegii auctoritate vel modo alio aliquo facere attemptarent, tam ipsum locum quam domum ibidem edificatam amitterent presentibus vel teneura (?) seu aliis iure minime valituris. Adiuncto, quod nichil ematur vel vendatur in dicta domo, vel inde modo aliquo extrahatur, de quo Domui Templi ius suum integre non reddatur, sicut de aliis mercimoniis, que apud Sceingniam vendentur vel ementur, preter res proprias dicti Monasterii Toplicensis ad usum proprium Abbatis et Conventus pertinentes; quod si fieret et probari posset, tam loco quam edificio, ut dictum est, privarentur. Verum res proprias dictorum Abbatis et Conventus usui ipsorum necessarias liceat eis ibidem emere et vendere, reponere et inde extrahere libere et pacifice pro sue libito voluntatis. Porro si contingeret memoratos fratres Domus Templi edificare fondicum Sciengnie, in quo omnia mercimonia venderentur et emerentur, prefati Abbas et Conventus in ipso fondico, et non in propria domo, res suas vendere et emere tenerentur, libere tamen et sine tributo aliquo, sicut in domo sua supradicta. In cuius rei noticiam et memoriam habendam in posterum pleniorem ad preces utriusque partis, presentes literas per alphabetum divisas, sigilli nostri munimine dedimus roboratas. Quarum partem unam habent sepedicti Abbas et Conventus, et aliam Domus Templi. Ceterum ad maiorem cautelam et roboris firmitatem prefati Abbas et Conventus, ac Magister Domus Templi antedictus, sigilla sua duxerunt presentibus apponenda. Actum anno Gracie MCCXL. mense Aprili.

(Tkalcsics, Monum. hist. Episc. Zagrab. I. köt. 78. l.)