In nomine Sancte Trinitatis et Individue Unitatis Amen. Bela Dei gracia Vngarie, Dalmacie, Croacie, Rame, Servie, Gallicie, Lodomerie, Cumanieque Rex in perpetuum. Circumspeccio Regum provida condignis premiis sibi obsequentibus sic decet occurrere, ut alii eorum exemplo invitati, ad servicia et probitatis studia forcius accendantur. Hac igitur consideracione inducti, ad universorum presencium posterorumque noticiam harum serie volumus pervenire: quod cum fidelis noster, Comes Hudina, a multo tempore grata nobis fidelitatis obsequia impendisset, sed et sua, absque diminucione aliqua, ad nostra beneplacita voluntatis exponendo, idem ipse de virtute in virtutem gradiens, eo maxime tempore, quo subita Tartarorum irrupcio, grave dispendium Regno nostro ingessit, nobis pariter et nostris ultra Drawam profectis, pro suo posse, per omne temporis spacium, quo moram ibidem traximus, iuxta nostri honoris decenciam, fideliter affuit et devote, laboribus et expensis rerum suarum, quos et quas sub obtentu gracie nostre, se et suos subire oportuit, pensatis minime vel curatis. Tandem nobis versus maritima progessis, iam dictus Comes Hudina pro honore Corone Regie, in Regno nostro existens, personam suam suis viribus contra Tartaros antedictos sepe ac sepius exponere non expavit, laudabiliter preliando, ubi eciam inito conflictu cum eisdem, post multorum cognatorum suorum necem et post multiplicem cruoris sui effusionem, prout nobis veraciter constitit, maximam nostrorum multitudinem ab hostili impetu defensavit. Porro cum de maritimis rediremus, duce Christo, prememoratus Comes Hudina nos et nostros honestate debita receptans, effudit largiter quidquid fuerat oportunum. Hiis itaque et quam pluribus huiusmodi fidelitatis operibus, pie circa ipsum inducti, eundem Comitem Hudinam, cum quatuor consanguineis suis, Petro videlicet, Gurke, Bogdano et Potochino in aulicos et servientes nostros recepimus speciales, cui eciam in recompensacionem tam eminencium serviciorum suorum, et ut aptior ad obsequia habeatur in futurum, quandam terram Wiscuz vocabulo, ultra Drawam, in Comitatu Simiguiensi existentem, de Regia liberalitate duximus conferendam, et per eum suis heredibus heredumque successoribus iure perpetuo possidendam. In cuius collacionis corporalem possessionem ipsum per fidelem nosatrum Ladizlaum Palatinum et Comitem Simiguiensem auctoritate Regia fecimus introduci. Cuius terre mete, sicut per litteras prefati Ladizlai Palatini et Comitis Symigiensis nobis constitit, hoc ordine distinguntur: prima meta incipit ab o riente ab aqua Ribinac apud duas arbores, quarum una gurtanfa dicitur et altera avellana, inde tendit per eandem aquam Ribinae versus meridiem perveniens ad aquam Ratcha, et incipit tenere metas cum Alexio, filio Moys, ubi sunt due mete terree sub arboribus, scilicet sub orno et piro, deinde per eandem aquam Ratcha tendit per partem meridionalem et ibi est meta terree sub arbore gurtanfa, et inde progrediens per eandem eadit in aquam Chasma, ubi est meta terrea sub arbore tulfa, et incipit tenere metas cum populi de Garig. Inde vero per Chasmam tendens inferius ad occidentem pervenit ad pontem, ubi est magna via, ubi eciam sunt due mete terree sub arboribus, quarum una tulfa dicitur et altera rekecia, incipiens ibidem tenere metas cum Episcopo Zagrabiensi, deinde vero tendens per eandem aquam Chasma pervenit ad arborem pomi, sub qua est meta terrea, inde vero protenditur ad locum, ubi est aqua Churnue, et aqua illa progrediens superius ad locum ubi propter inundaciones aquarum meta terrea fieri non potest, sed est arbor cruce signata, que arbor tulfa dicitur, et ibi incipit tenere metas cum populis Chesmice, demum quoque iuxta eandem aquam Churnuc progreditur superius verses septemtrionem, ubi est meta terrea sub ulmo, et iuxta eandem aquam tendit ad arborem, que dicitur gurtanfa, sub qua est meta terrea, et ibi incipit metas tenere cum Dyonisio Bano. Deinde vero vertitur ad orientem per eandem aquam Churnuc, de qua tendit usque ad aquam Musina, de qua eciam transiens pervenit ad campum ubi est meta terrea sub arbore gurtanfa, inde vero tendit versus meridiem ad magnam viam, que vadit per metas terreas versus orientem ad tres tylias, sub quibus sunt mete terree, et ibi incipit tenere metas filio Woinch Bani, et de ipse via vadit versus meridiem ad campum, ubi sunt due mete terree, et de illis duabus metis pervenit ad caput Ribinac, scilicet ad priorem metam, tenens cum predicto filio Woinch, ibique terminatur. Ut igitur hec a nobis facta donacio robur perpetuum obtineat, presentem concessimus paginam caractere bulle nostre auree communitam. Datum per manus dilecti et fidelis nostri Magistri Benedicti, Reverendi Archiepiscopi Colocensis et Aule nostre Cancellarii.Venerabili Stephano Archiepiscopo Strigoniensi, Bartholomeo Quinqueecclesiensi, Cleto Agriensi, Blasio Chenadiensi, Stephano Zagrabiensi, Benedicto Jauriensi, Heymone Wachiensi Episcopis; Sede Wesprimiensi vacante, Artholpho Preposito in Sedem Ultrasilvanam electo. Ladizlao Palatino et Comite Simiguiensi, Matheo Magistro Tawarnicorum nostrorum et Comite Posoniensi, Dyonisio Bano tocius Sclauonie, Demetrio Judice Aule nostre et Comito Musuniensi, Rolando Magistro Dapiferorum nostrorum et Comito Supruniensi, Arnoldo Comite Nitriensi, Mauricio Magistro Pincernarum et Comite Jauriensi, Stephano Magistro Agazonum et Comite de Vrbaz, Balduino Comite Castri Ferrei, Cazmerio Comite Albensi ac ceteris quam pluribus Magistratus et Comitatus Regni nostri tenentibus. Anno ab Incarnacione Domini MCCXLV; sexto kalendas Maii. Regni autem nostri anno X.

(Tkalcsics, Monum. hist. Episc. Zagrab. I. köt. 84. l.)