Innocentius Episcopus seruus seruorum Dei venerabili fratri... Archiepiscopo et dilectis filijs Clero Jadrensi salutem et Apostolicam benedictionem. Credentes firmiter et sperantes, ut preces nostras specialiter, cum pro religiosis personis illas vobis dirigimus, adimplere curetis; libenter ad ea, que religionis fauorem respicere dinoscuntur, nostris litteris vos hortamur. Hinc est, quod cum dilecti filij fratres Ordinis Predicatorum de Jadria illue ad petitionem vestram et civium Civitatis eiusdem, sicut intimantibus ipsis accepimus, fuerint destinati, et nondum ibi locum, ubi morentur, congruum potuerint obtinere: Universitatem uestram monemus et rogamus attente, per Apostolica vobis scripta mandantes, quatenus considerato prouide, quam sit utilis vobis in illis partibus fratrum presentia eorundem, ipsis de aliquo loco, in quo morari commode valeant, et deuote Domino famulari, ad collationem vestram spectante, in Ciuitate predicta providere libenter et liberaliter studeatis. Mandatum nostrum taliter impleturi, quod deuotionem vestram exinde dignis in Domino commendare laudibus valeamus. Datum Lugduni XII. kalendas Januarij, Pontificatus nostri anno secundo.

(Farlati, Illyricum Sacrum V. köt. 76. l.)