Bela Dei gracia Hungarie, Dalmacie, Croacie, Rame, Seruie, Gallicie, Lodomerie, Cumanieque Rex omnibus Christi fidelibus presentem paginam inspecturis salutem in Domino Jesu Christo. Quod Regia auctoritate sancitur, fundamento innititur perpetue firmitatis. Hinc est, quod ad uniuersorum noticiam tenore presencium volumus peruenire: quod Baas filius Comitis Baas Comes Trinchyniensis dilectus et fidelis noster, ad nostram accedens presenciam a nobis cum instancia postulauit, quod cum ipse, pro quibusdam suis oportunitatibus et necessitatibus eum compellentibus euidenter, terram suam Zobodycha uocatam, que quondam terra Castri nostri de Bana fuerat, quam pro suis fidelibus obsequijs et fidelitatibus meritorijs de nostra gracia est adeptus, quemadmodum priuilegium confectum exinde id declarat per singula seriatim, exponere uendicioni disponat, et ad uendendum predictam possessionem dare ei licenciam de benignitate Regia dignaremur. Nos autem attendentes, quod iustis petencium desiderijs nos deceat facilem prebere consensum, et uota, que a racionis tramite non discordant, effectu prosequente complere; eidem Baas Comiti Trinchiniensi dilecto et fideli nostro ad uendendum predictam terram dedimus licenciam specialem: qui demum se recognouit et confessus est in nostro conspectu, prenotatam possessionem suam Magistro Abe filio Abe dilecto et fideli nostro uendidisse, assignasse et exposuisse pro quadraginta marcis fini argenti plene ab eodem receptis iure perpetuo, tam sibi, quam suis filijs et posteritatibus successiuis inreuocabiliter cum omnibus vtilitatibus et pertinencijs suis, cum siluis uidelicet, nemoribus, fenetis et locis desertis possidendam. Vt igitur huius uendicionis siue distraccionis series robur obtineat perpetue firmitatis, nec possit nostris nostrorumque successorum temporibus per quempiam in irritum reuocari, presentes in perpetuam rei memoriam concessimus litteras dupplicis sigilli nostri munimine roboratas. Datum anno Domini M°CC° quadragesimo primo, quarto nonas Septembris, Regni autem nostri anno sextodecimo.

(A nyitrai káptalannak 1297-ki átiratából, mely 1300. »V. kal. Octobris« alatt III, Endre király alatt megerősíttetett; mindkét okmány a budai kir. kamarai levéltárban. Az 1300-kiban az évszám így van írva »M°CC°XL° primo.« V. ö. Fejér Cod. Dipl. VII. k. 1. r. 278. l., hol az évszám szintén hibásan 1241. iratik.)