Bela Dei gracia Vngarie, Dalmacie, Croacie, Rame, Seruie, Gallicie, Lodomerie, Cumanieque Rex omnibus tam presentibus quam futuris presentes inspecturis salutem in omnium saluatore. Ut Ecclesiarum utilitatibus Regia prouideat Celsitudo, pietas suadet, racio postulat, jus requirit; cum in hoc saluti anime diligencius consulatur. Proinde ad uniuersorum noticiam volumus peruenire; quod nos, qui ex officio suscepti regiminis utilitatibus Ecclesiarum inuigilare tenemur, Monasterio Sancte Marie de Insula per nos ex nouo fundato, in quo quidem carissime filie nostre et sorores uite commendabilis Deo deuote iugiter famulantur; ut idem Monasterium in aliqua parte pro sustentacione earundem sororum reditibus valeat ampliari, prouidere cupientes, tres partes cuiusdam terre nostre ad Castrum Zulgageuriense partinentis nomine Thena, existentis in Chyllokuz, quarum vnam relicta cuiusdam castrensis nomine Ilemer, secundam Dyonisius et Itemerius, soluentes Comiti seu Castro quinque pondera, et terciam Jonas filius Egud cum suis fratribus, ac Welprith, Mortun, Demeter et Ipolt inhabitabant, non obstante eo, quod idem Jonas cum fratribus suis supradictis iobagionem Castri se diceret, cum non esset; exceptis duabus particulis eiusdem terre, quarum vnam Wyluinus Comes Camere nostre, et aliam tawarnici nostri, preter tres partes memoratas optinere dinoscuntur, de plenitudine nostre gracie, cum piscatura et feneto, ac omnibus alijs utilitatibus et pertinencijs suis, predicto Monasterio Sancte Marie de Insula perpetuo duximus conferendas. Ut igitur hec nostra donacio robur perpetue firmitatis optineat, nec possit processu temporum in irritum aliquatenus reuocari, presentes dedimus litteras dupplicis sigilli nostri munimine roboratas. Datum per manus dolecti et fidelis nostri Magistri Pauli Electi Albensis aule nostre ViceCancellarij anno Domini millesimo ducentesimo sexagesimo primo, Regni autem nostri anno vicesimo sexto.

(Eredetie bőrhártyán, a zöld-sárga selyemzsinóron függő pecsétnek töredéke megvan; a budai kir. kamarai levéltárban.)