Bela Dei gracia Hungarie, Dalmacie, Crouacie, Rame, Seruie, Gallicie, Lodomerie Cumanieque Rex vniuersis Christi fidelibus presens scriptum inspecturis salutem in vero salutari. Regum pertined ad excellenciam, et dominancium conuenit dignitati, tanto amplius de maioris plebis numero gloriari, quanto ipsorum gloriam ex populi multitudine constat vberius augmentari. Hic est, quod vniuersorum noticie tenore presencium volumus fieri manifestum, quod nos hospitibus nostris de villa Beryn, et omnibus ad eam pertinentibus, talem libertatem concessimus et statuimus: quod de singulis mansionibus tria pondera soluere teneantur annuatim. Comes vero ipsorum bona sine herede decedencium recipere non presumat. Item judici pro judicio soluere debent sexaginta denarios tantum; nisi in causa furti vel sanguinis effusione. Item ad plaustrum Regis boues dare non tenentur; nec in legacione aliqua debent ire, nisi pro negocijs ville eorundem, aut in legacione domini Regis ad spacium diete vnius. Item pro decimis suis capecias soluant, prout prouenit in capecijs in tritura. Item ultra voluntatem eorum per Comitem ad exercitum ire non cogantur: nisi in exercitu Regis sub vexillo suo, vel ex mandato eiusdem speciali. Item Villicus eorum in minutis causis ipsos judicabit, et terciam partem judiciorum sibi seruabit, et alie due partes Comiti eorum remanebunt. Item Comiti de Segusd semel in anno prandium et cenam tenentur amministrare, prout alij eiusdem condicionis amministrant. Item pro nouitate Comitis tenentur dare duos denarios de singuli mansionibus annuatim. Item semel in anno Regi munera dare tenentur; et pabulum quod uulgo dicitur vamzob ad clicium portare suo modo compellantur. Item pro purificacione sacramenti duos denarios soluere tenebuntur. Vt igitur hec nostra ordinacio perpetue firmitatis robur obtineat, nec possit in posterum per aliquos irritari, presentes litteras eisdem hospitibus concessimus duplicis sigilli nostri munimine perenditer roboratas. Datum anno Domini millesimo ducentesimo LX. quarto, quinto idus Septembris, Regni autem nostri anno XX. octauo.

(V. István királynak 1270-ki megerősítő privilegiumából, a budai kir. kamarai levéltárban. Több nevezetes hibával kiadva Fejérnél Cod. Dipl. IV. köt. 5. r. 201. 1.)