Nos Johannes Banus tocius Sclauonie memorie commendantes significamus quibus expedit universis presentium per tenorem, quod venerabilis pater dominus Thymotheus, Dei gracia Episcopus Zagrabiensis, exhibuit nobis literas domini nostri Ladizlai, illustris Regis Vngarie, continentes: quod ob merita serviciorum eiusdem domini Episcopi quandam terram Castri Zagrabiensis, Fayz vocatam, sitam sub castro eiusdem domini Episcopi, ad ipsius peticionem sibi et Ecclesie sue cum omnibus utilitatibus et pertinenciis suis possidendam iure perpetuo contullisset, ab omni iurisdictione Castri Zagrabiensis penitus eximendo. Cuius quidem terre collacionem ipse dominus noster Rex eciam suo privilegio confirmasset, et precipiebat nobis in eisdem literis suis, quod prefatam terram Fayz eidem domino Episcopo et Ecclesie sue iuxta sui privilegii continenciam relinquere deberemus. Nos itaque mandatis domini Regis obtemperantes, ut debemus, considerantes eciam ipsius domini Episcopi meritoria obsequia et obsequiosa merita, que domino Regi in diversis Regni sui negociis et expedicionibus impenderat et impendere poterat in futurum, prefatum terram Fays, inspecto tenore privilegii domini Regis super collacione eiusdem confecto, reliquimus domino Episcopo et Ecclesie sue, et per eum suis successoribus, ab eodem Castro Zagrabiensi exceptam penitus et exemptam iure perpetuo et irrevocabiliter possidendam, sub eisdem antiquis metis et terminis, quibus Castrum Zagrabiense dinoscitur ab antiquo possedisse. Presentibus tamen et assencientibus iobagionibus Castri Zagrabiensis universis. In cuius rei memoriam et perpetuam firmitatem presentes concessimus literas munimine nostri sigilli roboratas. Datum Zagrabie in octava Penthecosten, anno Domini MDCLXXV.

(Tkalcsics, Monum. hist. Episc. Zagrab. I. köt. 176. l.)