Nos Conuentus Monasterij Beati Ypoliti martiris de Zobur damus pro memoria, quod vir religiosus dominus frater Martinus Abbas Monasterij Sancti Benedicti de iuxta Gron in sua et sui Conuentus personis ad nostram personaliter ueniendo presenciam, nobis per modum protestacionis significare curauit, quod Reuerendissimus in Christo pater dominus Philippus Archiepiscopus Ecclesie Strigoniensis, post recessum ipsorum Tartarorum de Regno Hungarie, plurimas possessiones et possessionarias porciones ipsorum domini Abbatis uidelicet et Conuentus sui et per consequens predicti Monasterij ipsorum potencialiter occupasset, de quibus quasdam restituisset, quasdam uero, videlicet decem mansiones nautarum in superiore parte possessionis Kakath vocate, cum terris trium aratrorum mensure regalis, ad easdem mansiones pertinentibus in Strigoniensi, item possessionem Odward cum terra quadraginta aratrorum similiter regalis mensure, ac propria eorum curia, ibidem existente, in Camariensi; nec non possessiones Nempti Zeules, Chenke et Berzenee uocatas, in Borsiensi Comitatibus habitas, ac intra metas dicti Monasterij existentes, pro se detinuisset minus iuste et indebite, in dampnum et detrimentum ipsorem ualde magnum; factaque huiusmodi protestacione eundem dominum Archiepiscopum et alios quoslibet ab occupacione, detencione, usuum fructuum ac vniuersarum vtilitatum earundem possessionum et possessionariarum porcionum percepcione, percipique faccione, seque ab intromissione in easdem quoquomodo facta uel fienda, vice et nominibus sui, predictique Conuentus sui inhibuit contradicendo et contradixit inhibendo coram nobis. Datum feria sexta proxima ante festum Beate Barbare virginis et martiris anno Domini millesimo ducentesimo LXXVIIş.

(Az eredeti után Knauz Nándor, Magyar Sion III. köt. 383. l.)