Pactum Farre et Bracie. Millesimo CCLXXVIII. mensis Aprilis die tercio intrante, presentibus nobilibus viris dominis Marino Valaresso, Andrea Geno et Armorao Justo, tunc Consiliarii domini Ducis, Marco de Mugla et Bartholomeo Capello et aliis. In capite sale, ubi sedent Judices Propri, venerabilis pater dominus S. Dei gratia Farensis Episcopus ex virtute commissionis sibi facte per homines Insule Farre, cuius exemplum inferius continetur, submisit ac subposuit ipsam insulam et alias sui Episcopatus et personas et havere hominum et personarum habitancium in ipsis insulis dominio et iurisdictioni Magnifici domini Jacobi Contareno Dei gratia Veneciarum ete. et Communis Veneciarum eo modo et forma, qua sunt subpositi alii sui fideles de Dalmacia, volens quod dominus Dux Veneciarum pro se et ipso Communi Veneciarum hominibus et personis predictarum insularum dare debeat Potestatem sive Rectorem, illum videlicet, qui ipsi domino Duci et Consilio Veneciarum placebit, et per tantum tempus per quantum ei placebit, ad regendum et gubernandum eos, cum illo capitulari et cum illa forma, quod et quam ei dabit dominus Dux predictus. Cui Potestati sive Rectori ipse expensas promisit, cum expensis et obligatione bonorum omnium comunium personarum ipsarum Universitatum, quod per Universitates ipsarum Insularum et sui Episcopatus, seu per illos de Farra tantum providebitur in salario et pro salario annuatim in libris mille venecialium parvorum secundum cursum que habet parva moneta in partibus illis, et in domo etiam pro habitatione ipsius; et quod hedifficabunt civitatem, que aliis tempribus fuit apud Sanctam Mariam de Lesna, pro habitatione hominum insularum ipsarum. Qui Potestas sive Rector ibit et stabit cum illa familia et equis, que placuerit domino Duci, et per tantum tempus, quantum videbitur domino Duci et Communi Veneciarum, promittentes sub pena mille marcharum argenti eidem domino Duci recipienti nomine et vice suo et Communis Veneciarum, quod per predictas Universitates et homines et personas ipsarum Insularum fuerint observata omnia et singula suprascripta; qua pena soluta si contrafacerent vel non soluta, predicta omnia et singula in sua permaneant firmitate.

Forma quidem syndicarie talis est: Magnifico domino et potenti Jacobo Contareno, Dei gratia Veneciarum, Dalmacie atque Croacie Duci et Domino Quarte Partis et Dimidie tocius Imperii Romanie, nec non Consilio eiusdem. Universitas nobilium et popularium de Fara qualiquumque subiectione humilius esse possit. Cum propter bonum status nostri spirituslis et temporalis iustum et per mundum approbatum regimen vestri Dominii, iam dudum desiderassemus, nunc autem nostris desideriis annuente Domino finem optatum facere cupientes, omnes unanimiter et concorditer mittimus ad Vestre Altitudinis sapientiam venerabilem patrem S. Dei gratia Episcopum Farensem, dominum et patrem nostrum, dantes eidem omnimodam auctoritatem, nostram universalem voluntatem suo nutui exponento, ut quiequid idem venerabilis pater cum Vestre Magnitudinis sapientia tractaverit et determinaverit, nos sub obligatione personarum et bonorum nostrorum ratum, firmum ac perpetuum volumus observare. In cuius rei testimonium presentes cum autentico sigillo Communitatis nostre fecimus roborari. Datum in Far in palacio Episcopali anno Domini millesimo CCLXXVIII, quinto intrante Februarii.

(Ljubics, Monum. sp. hist. Slav. Merid I. köt. 115. l.)