Philippus miseracione divina Firmanus Eposcopus Apostolice Sedis Legatus, religioso viro ... Guardiano Fratrum Minorum de Veruche, Zagrabiensis Diocesis, salutem in Domino. Querelam venerabilis patris Thymotei Dei gracia Zagrabiensis Episcopi recepimus continentem: quod indices et homines de Veruche et de Lipua et Comitatu eiusdem, Zagrabiensis Diocesis, pretextu guerrarum, que in partibus illis fuerunt temporibus retroactis, de decimis ad ipsum et Ecclesiam suam de iure spectantibus non curarunt hactenus, nec curant eidem in aliquo respondere in animarum suarum periculum et ipsorum Eposcopi et Ecclesie preiudicium et gravamen. Quare idem venerabilis pater nobis humiliter supplicavit, ut sibi et Ecclesie super hoc curaremus de oportunis remediis providere. Quocirca discrecioni tue, qua fungimur auctoritate committimus et mandamus, quatenus iudices et homines supradictos ex parte nostra efficaciter monere et inducere procures, ut de predictis decimis Episcopo et Ecclesie respondeant, et de subtractis satisfaciant, ut tenentur; alioquin cum simus omnibus in iusticia debitores, super hiis non possemus salva consciencia pertransire, quin ipsius Ecclesie indempnitati, et animabus ipsorum curaremus providere saluti. Insuper vos ex corde rogamus, ut omnibus transeuntibus per partes vestras pro reverencia Omnipotentis Dei et Sancte Romane Ecclesie nostrorum precaminum interventu securum transitum prebeatis. Datum in castro Budensi V. kalendas Octobris.

(Tkalcsics, Monum. hist. Episc. Zagrab. I. köt. 201. l.)