Ladizlaus Dei gracia Hungarie, Dalmacie, Croacie, Rame, Seruie, Gallicie, Lodomerie, Cumanie Bulgarieque Rex omnibus Christi fidelibus presentes litteras inspecturis salutem in eo, qui eternam Regibus dat salutem. Ad vniuersorum tam presencium quam futurorum noticiam harum serie uolumus peruenire: quod nos circumspeccione Regia pensatis fidelitatibus et meritorijs obsequijs et obsequiosis meritis Magistri Corraldi de Owar dilecti et fidelis nostri, que nobis temporibus oportunis laudabiliter exhybuit et impendit, propter quam uolentes sibi occurrere Regio cum fauore; considerantes eciam vtilitatem et comodum confinij Regni nostri, in eo scilicet, quia idem Magister Corraldus in ipso confinio in possessione sua hereditaria forte fecit castrum preparari, per quod conseruacio dicti confinij potissime gubarnatur: eidem Magistro Corraldo de nostra gracia concessimus speciali medietatem tributi, quod est in Musunio, qui keralquettey dicitur in wlgari; quod scilicet tributum ad Comitem Musuniensem pro tempore constitutum in nullo pertinere dinoscitur, cuius quidem tributi pars altera Albensem pertinet Capitulum, dedimus, donauimus et contulimus eidem Magistro Corraldo, (et) per eum suis heredibus heredumque suorum successoribus perpetuo et inreuocabiliter possidere. Ut igitur huiusmodi donacio seu statucio tributi siue concessio per nos facta perpetuo et inreuocabiliter perseueret, presentes dedimus et concessimus litteras dupplicis sigilli nostri munimine roboratas. Datum per manus Magistri Bartholomei discreti viri, Aule nostre ViceCancellarij dilecti et fidelis nostri anno Domini millesimo ducentesimo octuagesimo secundo; Regni autem nostri anno decimo primo (így).

(Eredetie bőrhártyán, melyről a pecsétnek töredéke sárga-vörös selyemzsinóron függ; a mélt. báró Révay család levéltárában.)